झापा । हल्दिवारी गाउँपालिकाले कानूनविपरित विद्यालय बन्द नगर्न शिक्षकहरुलाई चेतावनी दिएको छ ।
विगत तीन दिनदेखि शिक्षकहरु विद्यालय बन्द गरेर काठमाडौ केन्द्रित आन्दोलनमा संलग्न रहेका बेला हल्दिवारी गाउँपालिकाका अध्यक्ष रविन्द्रप्रसाद लिङ्देनले एक प्रेस विज्ञप्ति जारी गरी त्यस्तो चेतावनी दिएका हुन् ।
‘असन्तुष्ट पक्षहरुको माग पुरा गर्ने आफ्नै विधि, प्रकृया र पद्धति हुन्छन् । आफ्ना माग राख्दा बालबालिकालाई पठनपाठनबाट बञ्चित गर्नु कुनै पनि युक्तिसंगत र क्षम्य हुँदैन । संघीय सरकारसँगका माग सम्बोधनका नाममा शिक्षा क्षेत्रको गुणस्तर सुधारोन्मुख हुदै गरेको समयमा विद्यालय बन्द गरेर पुन शैक्षिक क्षति गर्नु निश्चय पनि शिक्षकको नैतिकता र आचरणले दिँदैन’ उनले भनेका छन् ,‘ शिक्षकका पेशागत ÷ वृत्ति विकासका लागि माग राख्ने र पुरा गर्ने विधि एवं प्रकृयाको मार्ग प्रशस्त हुँदाहुँदै विद्यालय शान्ति क्षेत्र र प्रचलित कानूनविपरीत विद्यालय बन्द नगर्न÷नगराउनु हुन यो विज्ञप्ति जारी गरिएको छ ।’
नेपाल सरकारले विद्यालयलाई शान्ति क्षेत्र घोषणा गरेको तथा विद्यालय शान्ति क्षेत्र राष्ट्रिय ढाँचा र कार्यान्वयन, २०६८ को बुँदा नं ६. २ को (घ) ले विद्यालयमा कुनै पनि दलीय राजनीतिक तथा अन्य स्वार्थका लागि विद्यालय बन्द, हडताल र पठनपाठनमा अवरोध गर्ने जस्ता कृयाकलाप नभएको हुनुपर्ने व्यवस्था गरेको स्मरण गराउँदै उनले शिक्षा ऐन, २०२८ को दफा ८५ र हल्दिवारी गाउँपालिकाको शिक्षा क्षेत्र व्यवस्थापन गर्न बनेको ऐन, २०७९ को दफा ५० मा भएको व्यवस्था प्रतिकुल हुने गरी तथा हल्दिबारी गाउँपालिकाभित्र सञ्चालित विद्यालय ‘विद्यालय शान्तिक्षेत्र’ को अवधारणाविपरित अवाञ्छनीय कार्य गर्न बन्देज गरिएको आन्दोलनरत शिक्षकहरुलाई अवगत गराएका छन् ।
