भरतपुरकाे सौराहामा एक हात्तीको सुँड काटिएको छ।
पर्यटन व्यवसायी दिपेश खतिवडाले आफूले पालेको पोथी हात्तीको सुँड अज्ञात समूहले काटिदिएको बताए।
अन्दाजी ४५ वर्षकी चञ्चलकली हात्तीको सुँड काटिएको हो।
गएराति साढे ११ बजेतिर हात्ती ठूलो स्वरले कराएपछि सुँड काटिएको अवस्थामा फेला परेको व्यवसायी खतिवडाले बताए।
कसले हात्तीको सुँड काटेको हो भन्ने आफूलाई थाहा नभएको पनि उनले बताए। चञ्चलकली भएको ठाउँमा अन्य दुइटा हात्ती पनि थिए। तर ती हात्तीलाई भने केही नगरेको पाइएको छ।
राष्ट्रिय निकुञ्जबाट आएको चिकित्सकको टोलीले चञ्चलकलीको उपचार गरेको छ।
हात्तीले त्यही सुँड प्रयोग गरी खाने गर्थ्यो। अहिले माउतेले हातले खुवाउने गरेको उनले बताए ।
यस्तै निकुञ्जमा रहेको नेपाली सेनाको टोलीले अनुसन्धान अघि बढाएको उनले बताए। तालिम प्राप्त कुकुरसहितको टोली घटनास्थलमा पुगेर अनुसन्धान गरिरहेको उनले बताए।
