बिर्तामोड । वीरता लेडी जेसीजले बुधवार झापाको बिर्तामोडमा ट्राफिक सचेतना कार्यक्रम आयोजना गरेको छ । बिर्तामोडस्थित न्युटन्स एजुकेसन एकाडेमीमा अध्ययनरत विद्यार्थीका लागि जेसीजले सचेतना कार्यक्रम आयोजना गरेको हो ।
कार्यक्रममा अध्यक्ष संगिता गिरीले आफन्त गुमाउँदाको पीडालाई ध्यानमा राखेर घरमा अरु कसैले पर्खिरहेको छ भनेर सम्झिनु पर्ने बताइन् । ‘दुर्घटना कम गर्ने विषयमा हामी सबैको चासो र चिन्ता छ’, कार्यक्रममा अध्यक्ष गिरीले भनिन्, ‘अव सबैजना अझ बढी सचेत र जिम्मेवार हुने बेला आएको छ ।’
कार्यक्रमका प्रमुख अतिथि न्युटन्स एजुकेसन एकाडेमीका प्रधानाध्यापक देवेन्द्र हुमागाईले ट्राफिक सचेतना शिक्षालाई विद्यालय तहमा अनिवार्य लागू गर्नु पर्ने बताए ।
‘हरेक विद्यालयमा ट्राफिक सचेतना शिक्षा दिइनु पर्छ’, प्रिन्सिपल हुमागाईँले भने । उनले नगरपालिकाले निर्माण गरेको स्थानीय पाठ्यक्रममा पनि ट्राफिक सचेतना सम्वन्धी सामग्री समावेश गरिएको जानकारी दिए ।
कार्यक्रममा जिल्ला ट्राफिक प्रहरी कार्यालय बिर्तामोडका प्रहरी नायव निरीक्षक जीवन कार्कीले दुर्घटनाको वर्तमान अवस्थाका विषयमा प्रकाश पारेका छन् ।
दुर्घटनामा युवाको बढी ज्यान जाने गरेको तथ्यांक प्रस्तुत गर्दै प्रनानि कार्कीले सवारी चालकको लापरवाहीले मानवीय क्षतिका घटना बढिरहेको बताए ।
उनले सवारी अनुमति पत्र नलिई सवारी चलाउँदा भएको दुर्घटना र त्यसले परिवारमा पारेको प्रभावका विषयमा उदाहारणसहित विद्यार्थीलाई ट्राफिक सचेतना शिक्षा दिएका छन् ।
प्रनानि कर्कीका अनुसार नेपालमा १७ देखि ३५ वर्ष सम्मका युवा बढी दुर्घटनामा पर्ने गरेका छन्, जसको दुर्घटना ५४ प्रतिशत छ । अपाङ्ग भएर जिउनु पर्दा जीन्दगी भर पछुताउनु पर्ने प्रनानि कार्कीले बताए ।
कार्यक्रम संयोजकको रुपमा उपाध्यक्ष प्रियंका उप्रेतीले स्वागत मन्तव्य राखेको कार्यक्रममा निवर्तमान अध्यक्ष संगीता चिमरियाले कार्यक्रमको औचित्यमाथि प्रकाश पारेकी छन् ।
कार्यक्रममा पूर्व अध्यक्ष पार्वता विमली खरेल, न्युटन्सका शिक्षक अभिभावक संघका अध्यक्ष नरेशमान भट्टराई शुभकामना मन्तव्य राखेका छन् ।
महासचिव निशा शाक्यले सञ्चालन गरेको कार्यक्रममा रोजिना पाण्डेले मिसन भिजन र कोषाध्यक्ष सुमित्रा भट्टराईले जेसीज आस्था वाचन गरेका छन् ।
जिल्ला ट्राफिक प्रहरी कार्यालयको तथ्यांकले सबैभन्दा बढी असोजमा मानवीय क्षतिका घटना भएको देखाएको छ । असोजमा १६ जनाले ज्यान गुमाएका छन् । माघमा सबैभन्दा कम सात जनाको मृत्यु भएको छ ।
सवारी दुर्घटनामा बालबालिका पनि पर्ने गरेका छन् । अभिभावकसँगै यात्रारत बालबालिकाका झन् जोखिममा रहेको प्रहरी सहायक निरीक्षक यामकुमार खँडका बताउँछन् । उनका अनुसार असोज, मंसीर र पुसमा भएका सवारी दुर्घटनामा चार जना बालबालिकाले ज्यान गुमाएका छन् ।
