झापाका माझी समुदायले दोमुखामा गरे कोशी पूजा (लदी पूजा)
बिर्तामोड । झापाका प्रकृतिपूजक माझी समुदायले कोशी पूजा (लदी पूजा) धार्मिक पर्यटकीय स्थल दोमुखामा विविध मौलिक कार्यक्रमसहित सम्पन्न गरेका छन् ।
माझी समुदायले प्रत्येक वर्ष फागुनको तेस्रो मंगलबार कोशी पूजा (लदी पूजा) पूजा गर्ने गरेको र त्यसै अनुरुप मंगलबार लदी पूजा गरिएको हो ।
आफ्नो पुख्र्यौली पेशा डुङ्गा चलाउने भएकाले वर्षभरि खोलामा डुुङ्गा चलाउँदा कुनै दुर्घट्ना नहोस्, दैवी विपत्ती नपरोस् भन्ने उद्देश्यका साथ खोला नदी किनारमा विधिपूर्वक पूजा आरधना गर्ने मौलिक परम्परा रहेको नेपाल माझी उत्थान संघ झापाका अध्यक्ष कृष्णबहादुर माझीले बताए ।
प्रकृतिपूजक माझी समुदायले पानीलाई ईश्वरीय स्वरुप मानी परापूर्वकालदेखि खोला, नदी, तलाउमा पूजा सम्पन्न गरिदै आएको उनले बताए ।
नेपाल माझी उत्थान संघ झापाका अध्यक्ष कृष्णबहादुर माझीको अध्यक्षता तथा शिवसताक्षी नगरपालिकाका नगर प्रमुख रोषन थोप्राको प्रमुख आतिथ्यमा भएको कार्यक्रममा नेपाल माझी उत्थान संघ जिल्ला कार्य समिति झापाका वरिष्ठ उपाध्यक्ष मणीकुमार माझीले स्वागत गरेका थिए भने जिल्ला सल्लाहकार सदस्य गंगा माझीले स्वागत गीत गाएका थिए ।
शिवसताक्षी नगरपालिका वडा नं. १० स्थित कन्काईमाइको किनारमा सफा गरी लिङ्गा गाडी ध्वजा पतकाहरुले सजाई देवीको स्थापना गरी पूजामा केराको पात ओच्छ्याएर दियो, कलश, अक्षता, फूल, पान, सुपारी, मिठाई आदि राखेर भाकल अनुसारको हाँस, परेवा, कुखुरा, बोका, पाठी, राँगा आदिको पञ्चबली दिइएको थियो । पूजास्थलमा प्रमुख अतिथि थोप्राले पूजाआजा गरेका थिए भने उनलाई माझी समुदायका पुरोहित, ज्येष्ठ अभिभावकलगायतले टीका लगाइदिएर आशिर्वाद दिएका थिए ।
कार्यक्रममा सहभागी वक्ताहरुले सबै जातजातिका पर्वहरुमा नेपाल सरकारले सार्वजनिक विदा दिने गरेको भए पनि माझी जातिको सबैभन्दा ठूलो पर्व कोशी पूजा (लदी पूजा) मा भने सरकारले विदा नदिएको नगर प्रमुख थोप्रासंग गुनासो गरेका थिए ।
कार्यक्रममा नेपाल आदीवासी जनजाती महासंघ झापाका अध्यक्ष पाण्डवलाल चौधरी, मानव विकास केन्द्रका अध्यक्ष भरत कुसुवारलगायतले शुभकामना दिएका थिए ।
कोशी पूजा (लदी पूजा) पहिलो दिन मंगलबार पूजा आरधना, नृत्य, गायन, माझी जातिका भेषभूषा पहिरन, प्रर्दशनी पुख्र्यौली सामग्रीहरुको प्रर्दशनीलगायत गरीएको सुमन माझीले बताए ।
त्यस्तै बुधबार आफ्ना भाइ, बन्धु, कुल कुटुम्ब, चेलीबेटी, ज्वाई चेला, भान्जा भान्जी, आफन्तजन भेला भई मेलमिलाप गर्ने, शुभकामना आदनप्रदान गर्ने, मिठो मसिनो खान दिने र खाने उनले बताए ।
पूजामा झापाका सबै पालिका साथै मोरङ, इलाम लगायत भारतको दार्जिलिङबाट अतिथि तथा सहभागीहरुको सहभागिता रहेको थियो ।
कार्यक्रमको सञ्चालन नेपाल माझी उत्थान संघ झापाका सचिव बलबहादुर माझी, शान्ती माझीले गरेका थिए ।
