झापा २५ । झापाको अर्जुनधारा ९ स्थित खरबन्दीमा नमुना च्यालेन्ज कप फुटबल प्रतियोगिता हुने भएको छ ।
नमुना सामुदायिक युवा क्लब अर्जुनधाराले आयोजना गरेको प्रतियोगितामा दुई वटा विदेशी टिमसहित ८ टिम सहभागी हुने भएका छन् ।
क्लबले आइतबार (आज) खेलमैदानमा पत्रकार सम्मेलन मार्फत प्रतियोगिताबारे जानकारी गराएको हो । आयोजक क्लबसँगै भारत र अमेरिकाको १ /१ वटा टिम र ललितपुर, सुनसरी, मोरङ, इलाम र झापाको टिमले प्रतिस्पर्धा गर्ने क्लबका अध्यक्ष आर.के. महताराले जानकारी दिए ।
प्रतियोगितामा इलामको रेडहर्ष एफसी, झापाको ध्रुवतारा स्पोर्टिङ क्लब, मोरङको डाँगीहाट एफसी, सुनसरीको एन्फा एकाडेमी धरान, आयोजक नमुना सामुदायिक युवा क्लब, ललितपुरको सुनाकोठी सिटी एफसी, भारतको एबीसी एकाडेमी र अमेरिकाको बीवाईसीले सहभागिता जनाउने छन् ।
अध्यक्ष महताराका अनुसार प्रतियोगिता यहि मंसिर २९ गतेदेखि पौष ७ गते सम्पन्न हुने खेलमा १४ लाख ५० हजार खर्च हुने अनुमान गरिएको छ । प्रतियोगिताबाट बचत रहेको रकम स्थानीय विद्यालयमा अध्ययनरत कक्षा ५ मुनिका विद्यार्थीलाई फुटबल प्रशिक्षणमा खर्च गरिने उनले बताए ।
बिजेता टिमले १ लाख ११ हजार र उप बिजेताले ५१ हजार रुपैयाँ ट्रफी,मेडल र प्रमाणपत्र प्राप्त गर्ने आयोजक सुरेन्द्र गिरिले जानकारी दिए। पत्रकार सम्मेलनमा झापा जिल्ला फुटबल संघका अध्यक्ष भगिरथ आले ‘मामा’, राष्ट्रिय खेलाडी विशाल राई, देवेन्द्र तामाङ, ९ नम्बर खेलकुद विकास समितिका अध्यक्ष सुरेन राईलगायतको उपस्थिति थियो ।
