माध्यमिक तहसम्मको शिक्षा स्थानीय सरकारको मातहतमा आएसँगै सामुदायिक बिद्यालयको स्वरूप परिवर्तन हुन थालेको छ । कतिपय जनप्रतिनिधिहरुले सामुदायिक विद्यालय सुधारको अगुवाइ गरेपछी शिक्षा क्षेत्रमा सकारात्मक परिवर्तनको आस गर्न थालिएको हो ।
पछिल्लो समय यस्तै सुधार र परिवर्तनको उदाहरण बनेको छ, झापा बिर्तामोड नगरपालिका २ चारपानेमा रहेको वीर अमरसिंह प्राबिधिक माध्यमिक बिद्यालय । बिर्तामोड वार्ड नं २ का निर्वाचित वडा सदस्य समेत रहेका विद्यालय ब्यबस्थापन समितिका अध्यक्ष किशोर पौडेल विद्यालयको भौतिक संरचना र ब्यबस्थापकिय पक्षमा गरिएको परिवर्तनले बालबालिका र अभिभावकमा उत्साह देखिएको बताउँछन् ।
भौतिक संरचना सुधार, खेल मैदान, आधुनिक र बालमैत्री कक्षाकोठा सहित शैक्षिक गुणस्तर समेतमा ध्यान दिईएपछी विद्यालय सुधारको आशा पलाएको स्थानिय अविभावकहरुको भनाइ छ । गत बर्ष सम्म स्कुलको खेल मैदान गौचरन सरह थियो । कम्पाउण्ड नभएकाले कक्षा संचालन भइरहेको समयमा स्थानीयले गाई बस्तु चराउने, बाहिरी मानिसको आवतजावत हुनाले हो हल्ला भैरहने, गाडी ,मोटरसाइकल सिक्ने जस्ता गतिविधिले बालबालिका लाई खेल्ने र मनोरञ्जन गर्ने ठाउँको अभाव थियो ।
लकडाउनको समयलाई बिद्यालयले सदुपयोग गर्दै हाल १ बिगाहा क्षेत्रफलमा रहेको खेलमैदान घेराबारा गरेको छ । वडा कार्यालय मार्फत नगरपालिकाले १४ लाख बजेट बिनियोजन गरिदिए पछि एउटा मुल गेट सहित ४ वटा गेट निर्माण सम्पन्न भएको छ ।
घेरावारा नहुँदा चौरीमा मधु,चाउचाउ ,चक्लेटका खोल भेटिन्थे ,त्यहाँ बालबालिकाहरुलाई खेल्न र अन्य गतिविधि गर्न गाह्रो थियो । गोवरमा बालबालिका चिप्लिएर लड्ने गर्थे । तर अहिले घेराबारा पश्चात् बालबालिकाहरु रमाएर खेल्न सक्ने भएका छन । चौरमा उम्रीएको घाँस स्थानीयले काटेर लाने गरेका छन । बाताबरण पनि हरियाली भएको छ । कम्पाउण्ड खुल्लै हुँदा बालबालिका असुरक्षित थिए, अहिले ब्यबस्थापन गर्न पाएकोले केही सुरक्षीत महसुस भएको विद्यालय ब्यबस्थापन समितीका अध्यक्ष किशोर पौडेल बताउँछन् ।
यतिमात्र होइन नगरपालिकाको १६ लाख र आन्तरिक श्रोत बाट ८ लाख रुपैयाँमा जुटाएर विद्यालयमा २ कोठे आधुनिक भवन समेत निर्माण भएको छ । एटेज ट्वाइलेट,बाथरुम सहितको आधुनिक भवन बनाउन पाएकोले सरसफाइमा सहज हुने प्रध्यानाध्यापक यदुनाथ अधिकारीको विश्वास छ । जम्मा ४०/४५ मिनेटको टिफिनको समयमा १ हजार भन्दा बढी विद्यार्थीलाई सानो ट्वाइलेटले समस्या हुने गरेको थियो । किशोरीहरुलाई रजस्वला भएको बेला सेनेटरी प्याड फेर्न समेत धेरै गाह्रो थियो । अहिले उनीहरुका लागि पनि बिशेष कक्ष निर्माणको कार्य भइरहेको अधिकारीले बताए ।
अबका दिन दुर्गन्ध रहित बातावरणमा विद्यार्थीले अध्ययन गर्नेछन् । अध्यक्ष पौडेल भन्छन्, “बालबालिका पढ्ने विद्यालय बालमैत्री हुन्छ त्यो अभियानमा हामी छौँ ।” प्रत्येक कक्षाकोठामा खानेपानीको धारा ,पंखा र आवश्यक बस्तु राखिएको छ । विद्यालयलाई राजनीति भन्दा टाढा राख्दै सबै एकजुट भएर लागेमा शैक्षिक गुणस्तर कायम गर्न सकिन्छ, बालमैत्री कक्षाकोठा र खेलमैदान निर्माण गर्न सकिन्छ । वीर अमरसिंह प्राविधिक मावि पछिल्लो समय यहि कुराको उदाहरण बन्दै गएको छ ।
