भाद्र ३ झापा – अखिल नेपाल महिला संघ झापाको नवौँ जिल्ला अधिवेशन बिर्तामोडमा हुने भएको छ। संघले आज बिर्तामोडमा पत्रकार सम्मेलन गरी भदौ ४ र ५ गतेका लागि सम्मेलन आयोजना गरिएको जनाउँदै सबै तयारी पूरा भएको जानकारी दिएको हो ।
बिर्तामोडमा आयोजना गरिएको सम्मेलनको शनिवार नेकपा एमालेका अध्यक्ष केपी शर्मा ओलीले उद्घाटन गर्ने बताईएको छ।
बुधबार झापा आएका ओलि विभिन्न कार्यक्रममा सहभागी हुँदैछन । पार्टी एकता र बिभाजनका कारण तीन वर्षे कार्यकाल रहेको अनेम संघको अधिवेशन आठ वर्षपछि हुन लागेको हो ।
अनेम संघकी केन्द्रीय सचिव मेनुका काफ्लेका अनुसार झापा जिल्ला कमिटीले यो पटक पार्टी काम र महिला मुक्ति आन्दोलनमा लाग्दा जेल बसेका, हिरासतमा परेका महिलालाई सम्मान गर्ने छ ।
अधिवेशनमा अनेम संघको नेतृत्व गरिसकेका जिल्ला अध्यक्षहरुलाई पनि सम्मानको कार्यक्रम राखिएको छ ।
अनेम संघकी केन्द्रीय सदस्य एवम् संघीय सांसद पवित्रा निरौलाले आगामी मंसिर ४ गतेको निर्वाचनलाई ध्यानमा राखेर एमालेको पक्षमा जनमत सिर्जना हुने गरी संगठन परिचालन गर्ने नीतिका साथ झापा जिल्ला अधिवेशन आयोजना गरिएको बताइन् ।
संघकि अध्यक्ष जसमाया गजमेरले सम्मेलनमा दुई हजार महिलाको सहभागिता रहने पत्रकार सम्मेलनमा जानकारी दिईन । १ सय ५१ सदस्यीय जिल्ला कमिटी गठन गर्ने र त्यसका लागि सर्वसम्मत प्रक्रिया अवलम्वन गरिने जनाइएको छ ।
