नेपाल विद्युत प्राधिकरणले आज ३७ औँ वार्षिक उत्सव मनाउँदैछ।
‘पहिले विद्युत उज्यालोका लागि, अबको विद्युत उज्ज्वल भविष्यका लागि’ भन्ने नारासहित मनाइने वार्षिक उत्सवको अवसरमा आज बिहान १० बजे नेपाल प्रज्ञा प्रतिष्ठानको हल कमलादीमा विषेश कार्यक्रम हुदैछ।
कार्यक्रममा २० वर्षे सेवा अवधि पुरा गरेका कर्मचारीलाई दीर्घ सेवा पदकद्वारा सम्मान गरिने प्राधिकरणले जनाएको छ। यस्तै पछिल्लो एक वर्षको अवधिमा अवकाश प्राप्त गरेका कर्मचारीलाई उपहार पदक प्रदान गर्ने कार्यक्रम छ।
नेपाल विद्युत प्राधिकरण २०४२ साल भदौ १ गते स्थापना भएको हो। लामो समयसम्म घाटामा रहेको प्राधिकरण पछिल्लो वर्षहरुमा नाफामा छ। कुनै दिन दैनिक अठार घण्टासम्म लोडसेडिङ हुने गरेको थियो। तर हाल नेपालले छिमेकी देशमा विद्युत बेच्न थालेको छ। प्राधिकरणको सौर्य प्लान्टसहित कुल ७ सय ३५ मेगावट विद्युत गत वर्ष प्रणालीमा थपेसँगै वर्षा याममा भन्दाबढी विद्युत उत्पादन गर्न सकिने अवस्थामा पुगेको प्राधिकरणका कार्यकारी निर्देशक कुलमान घिसिङले बताएका छन्।
विद्युत निर्यातको वृद्धि हुँदा प्राधिकरणको आर्थिक अवस्थामा सुधार आएको घिसिङले सार्वजानिक गरेको प्रतिवेदनमा उल्लेख छ। ३७ वर्षको इतिहासमा प्राधिकरणले गत आर्थिक वर्षमा १६ अर्व १६ करोड ५० लाख रुपैयाँ खुँद मुनाफा आर्जन गर्न सफल भएको छ।
विद्युत खपतमा भएको वृद्धि, चुहावट नियन्त्रण, प्राधिकरणको विद्युत गृहबाट उत्पादित विद्युत परिमाणमा वृद्धि, ४५६ मेगावाटको माथिल्लो तामाकोसी सन्चालन, विद्युत आयातमा कमि तथा निर्यात वृद्धिलगायतका कारण मुनाफा आर्जन गर्न सफल भएको घिसिङले उल्लेख गरेका छन्।
हाल नेपालमा विद्युत उपभोग गर्नेको ग्राहकको कुल संख्या ४७ लाख ७० हजार पुगेको प्राधिकरणले जनाएको छ।
