९ बैसाख, अर्जुनधारा । झापाको अर्जुनधारा नगरपालिका वडा नम्बर ५ मा गएराती अज्ञात समुहले २ वटा गाईलाई बिषादी ख्वाएर मारेका छन । अर्जुनधारा ५ देवभूमी विद्यालय नजिकै रहेको प्रेम डाँगीको गोठमा बाँधेका २ वटा गाईलाई भुसमा युरिया मिसाई मारेको अनुमान गरिएको छ । केही दिन अघिमात्रै ब्याएका र बिमा पनि नगरिएका गाई अज्ञात समुहले मारेको पशु धनी डाँगीले बताए ।
रातको समयमा छट्पटाईरहेको थाह पाएपछि उठेर हेर्दा गाईहरुको अवस्था चिन्ताजनक भएपछि स्थानिय प्रहरी चौकी र पशुपक्षी शाखा अर्जुनधारालाई खबर गरिएको डाँगीको भनाई छ । प्रहरी र पशु शाखाको टोलीले शुक्रबार बिहान अनुसन्धानका लागि आवश्यक नमुना संकलन गरी लगेको अर्जुनधारा नगरपालिकाका पशु विकास अधिकृत पदम राईले जानकारी दिएका छन ।
राईका अनुसार संकलित नमुना परिक्षणका लागि विराटनगर नै पुर्याउनुपर्ने र स्वयम् पशु धनी उपस्थित हुनुपर्ने भएकाले शाखाका तर्फबाट आवश्यक सहजीकरण गरिएको छ । देवभूमी विद्यालयका प्रिन्सिपल राकेश कट्टेलले घटनामा संलग्नलाई कडा कारवाही गर्न प्रसासन समक्ष माग गरेका छन ।
