झापा । बिर्तामोड नगरपालिकाबाट प्रमुख प्रशासकीय अधिकृत गणेशप्रसाद दाहाल सरुवा भएर फिदिम गएको दुई साताभन्दा बढी भइसक्यो । तर, अहिलेसम्म अब नयाँ प्रमुख प्रशासकीय अधिकृत को आउने हो भनेर टुंगो लागिसकेको छैन ।
यद्यपि बिर्तामोड नगरपालिकामा प्रमुख प्रशासकीय अधिकृतमा धेरैको इच्छा देखिन्छ । प्रदेश नं १ को मुख्यमन्त्री कार्यालयबाट विनोद न्यौपाने , त्यसैगरी सुनसरीको रामधुनी नगरपालिकाबाट ओमकार न्यौपाने , त्यस्तै अग्नि अधिकारीको चर्चा रहेको छ । तर , सामान्य प्रशासन मन्त्रालयले कसलाई बिर्तामोडको प्रमुख प्रशासकीय अधिकृत बनाएर पठाउने हो भन्ने बिषय अहिलेसम्म टुङ्गो लाग्न नसकेकाे हाे ।
सरकारले आगामी जेठ ४ गतेका लागि स्थानीय तहको निर्वाचन प्रस्ताव गरेसंगै राजनीति दलहरु आफू अनुकुलको ब्यक्ति ल्याउन लागि परेका छन् ।
नगरपालिकाको आर्थिक कारोबार रोकिएकाले नगरको काम प्रभावित बनेको छ। यस अघि नै टुङ्गो लाग्नु पर्ने हो तर रास्ट्रिय सभाको चुनावका कारण आचारसंहिताका लाग्ने भएकाले अब केही दिनभित्र नयाँ प्रमुख प्रशासकीय अधिकृतको टुगो लाग्ने वरिष्ठ कार्यक्रम अधिकृत जय तिम्सिनाले बताए ।
