४ मंसिर, हल्दिबारी । झापाको हल्दिबारी गाउँपालिका वडा नं.३ मा मेनर्जी चोकबाट उत्तर कन्टरघुटु हुँदै रामहरि चोक जाने बाटो कालोपत्रे सम्पन्न भएको छ ।
गाउँपालिका, प्रदेश सरकार, संघिय सरकारको संयुक्त लगानीमा सञ्चालित निमार्ण आयोजनाको ठेक्का खनाल इभरग्रीन जेभी बिर्तामोडले पाएको थियो । २०७७ चैत २२ गते गाउँपालिकासँग निर्माण सम्झौता भएको खनाल इभरग्रीनले २०७९ अशोज ०६ गते निमार्ण सम्पन्न गर्ने भएको थियो ।
२ करोड ९६ लाख ७१ हजार ५ सय ९३ रूपैयाँ ९२ पैसाको लागतमा निमार्ण सम्झौता गरेको थियो । तर, समयाबधि भन्दा करिब ११ महिना अगाडि नै काम सम्पन्न गरेर गाउँपालिकालाई जिम्मा दिने भएको खनाल इभरग्रीन जे भि का सञ्चालक भरत भट्टराईले जानकारी दिए । मेजर्नी चोकदेखि सुरु हुने कालोपत्रे रामहरि चोक आईपुग्दा ४२०० मिटर लम्बाईको दुरी हुन्छ । सडकको दाँया बाँया ३० फुटे चौडा रहने र ५ मिटर कालो पत्रे गरिएको ठेकेदार कम्पनीले जनाएको छ ।
हिउँदमा धुलाम्मे र वर्षामा हिलाम्मेको सास्ती लामो समयदेखि खेपेका सडक खण्ड छेउ छाउका स्थानीयवासी सडक पक्की भएपछि खुसी देखिएका छन् । स्थानीयबासी लाल बहादुर सावाँले कल्पना समेत नगरेको बिकास निर्माण कार्यहरु पालिकाले गरेको बताए । सो कालेपत्रे सडकको अगुवाई हल्दिबारी गाउँपालिका उपाध्यक्ष डम्बरबहादुर गिरीको पहलमा निर्माण सम्पन्न भएको स्थानीयले बताए । उपाध्यक्ष गिरिका अनुसार गाउँपालिकामा २० किलोमीटर कालोपत्र सम्पन्न भएको र अन्य ३० ठेक्का सम्झौता भई सकेको र निर्माण कार्य जारिरहेको जानकारी दिए।
