१७ कार्तिक, बिर्तामोड । नेकपा एमाले बिर्तामोड नगर कमिटीको अध्यक्षमा सुवास भट्टराई भारी मतले निर्वाचित भएका छन् ।
अध्यक्षका प्रत्याशी उमानाथ ओलीलाई १३७ मतको फराकिलो अन्तरले पाराजित गरी युवा नेता भट्टराई निर्वाचित भएका हुन् । गएराति सम्पन्न मतगणनाको परिणाम अनुसार भट्टराईले २७७ मत प्राप्त गरेका छन् । उनका प्रतिद्वन्दी ओलीले १४० मत प्राप्त गरे ।
त्यस्तै नगर कमिटीको उपाध्यक्षमा २१४ मत प्राप्त गर्दै पुष्पा दाहाल निर्वाचित भइन् । उनका प्रतिद्वन्दी उर्मिला विमली खरेलले १९४ मत प्राप्त गरिन् ।
यस्तै, सचिवमा शेखर कँडेल २१६ मतसहित निर्वाचित भएका छन् । उनका प्रतिद्वन्दी शंकरराज ढुङ्गेलले १८६ मत प्राप्त गरेका छन् । उपसचिव पदमा प्रकाश लिङ्देन १७९ र मदन बुढाथोकी १७० मतसहित निर्वाचित भएका छन् ।
दुई जना उपसचिवका लागि ८ जनाबीच निर्वाचन भएको थियो । उपसचिवका पराजित उम्मेद्वारहरु डिल्ली सुब्बा १६९, प्रदिप खरेल ८२, कान्तिबहादुर कार्की ३४, केशव भण्डारी ६१, पारस संग्रौला ८३ र ताराप्रसाद चापागाईले ३६ मत पाएका छन् ।यस्तै सदस्यमा गुञ्जन प्रसाई र किशोर भट्टराई निर्वाचित भएका छन् ।
दलित सदस्यमा रोशन घतानी र सुमन त्रिखत्री निर्वाचित भएका छन् । आज दिउँसो २ बजे जिल्ला पार्टी कार्यालयमा सपथ ग्रहण गराइने अध्यक्ष मण्डलका सदस्य बद्री भट्टराईले जानकारी दिए ।
