१९ असोज, झापा । सशस्त्र प्रहरीले भद्रपुर र मेचीनगरबाट लागुऔषधसहित दुई जनालाई पक्राउ गरेको छ । सशस्त्र प्रहरी बल नेपाल बोर्डर आउट पोष्ट पृथ्वीनगरले सोमबार बेलुका भद्रपुर नगरपालिका ३ बाट बिर्तामोड नगरपालिका १० सैनिकमोड निवासी ४४ वर्षीय मिलन गुरुङ्गलाई लागुऔषध र विदेशी रकमसहित पक्राउ गरेको हो ।
भारतबाट नेपालतर्फ लुकिछीपी आउने क्रममा सशस्त्र प्रहरीले सीमामा रोकेर चेकजाँच गर्दा गुरुङ्गको साथबाट ईस्कफुल कउफ ४२ बोतल, नाइट्राजेनपाम ट्याब १० पत्ता (१०० थान) र बिभिन्न १० मुलुक विदेशी रकम फेला परेको सशस्त्र प्रहरी बल नेपाल नम्बर २ गण झापाका डिएसपी प्रेमबहादुर भण्डारीले जानकारी दिए ।
त्यस्तै सशस्त्र प्रहरी बल नेपाल बोर्डर आउट पोष्ट सतिघट्टाले मेचिनगर नगरपालिका ७ स्थित मेची पुल मुनिबाट पाँचथर जिल्ला मिक्लाजुङ्ग गाउँपालिका घर भई हाल झापाको कमल गाउँपालिका ६ निवासी १९ वर्षीय दिवाना राईलाई ब्राउन सुगर सहित पक्राउ गरेको छ ।
भारतबाट नेपालतर्फ लुकिछीपी आउँदै गरेको उनलाई शंकालागी चेकजाँच गर्दा ३ ग्राम ब्राउनसुगर बरामद गरिएको डिएसपी भण्डारीले जानकारी दिए । यता पक्राउ परेका दुवै जनालाई आवश्यक कारवाहीका लागि नेपाल प्रहरीलाई बुझाइकसेको जनाइएको छ ।
