बिर्तामोड । केही दिन अगाडी झापा भद्रपुरकी ११ वर्षीय बालिकामाथी कुटपिट तथा शारीरिक हिंसा भएको भन्ने विषयमा सामाजिक सञ्जाल तथा समाचारहरुमा आएका विषयवस्तु उपर राष्ट्रिय मानव अधिकार आयोग र राष्ट्रिय बाल अधिकार परिषदको संयुक्त टोलीले मंगलबार स्थलगत अनुगमन गरेको छ ।
अनुगमन टोलीले स्थलगत रुपमा पीडित बालिका, उनको परिवार, भद्रपुर नगरपालिका, प्रहरी लगायत घटनासँग सम्बन्धित सरोकारवाला विविध पक्षहरुसँग छलफल गरेको छ ।
अनुगमन टोलीमा राष्ट्रिय मानव अधिकार आयोग – प्रदेश कार्यालय, विराटनगरका निमित्त प्रमुख नितु गड्तौला, राष्ट्रिय बाल अधिकार परिषदका प्रदेश समन्वय अधिकृत सुमन अधिकारी, परिषदको कोभिड संकट बाल संरक्षण सहायता स्वयंसेवी समूहका सदस्य प्रजेश खनाल र प्रदेश बालबालिका खोजतलाश तथा समन्वय केन्द्रका अ.स.ई. नारायण कटुवाल बालबालिका तथा शिक्षा संचार मञ्च नेपाल संयोजक सरोज पौडेल ,शृजन घिमिरेको सहभागिता थियो ।
टोलिले नगर बाल संजाल ,नगरपालिका प्रमुख, उपप्रमुख,फोकल पर्सन लगायतसंग जानकारी लिएको छ । 
अनुगमनमा देखिएको विषयवस्तुहरुलाई विश्लेषण गरी सुझाव तथा सिफारिसहरु सहित अनुगमन टोलीले प्रतिवेदनका रुपमा राष्ट्रिय मानव अधिकार आयोग र राष्ट्रिय बाल अधिकार परिषदलाई पेश गरिने परिषदका प्रदेश समन्वय अधिकृत सुमन अधिकारीले जानकारी दिए ।
