काठमाडौं । पूर्वीमध्य बंगालको खाडीमा रहेको न्यून–चापीय प्रणाली चक्रवातमा परिणत भैसकेको छ । यो उत्तर–उत्तरपश्चिम सर्ने क्रममा आज धेरै शक्तिशाली चक्रवातमा परिणत हुने छ । जल तथा मौसम विज्ञान विभागका अनुसार बुधबार सम्ममा अति धेरै शक्तिशाली चक्रवातमा परिणत हुने देखिएको छ । यसको असर केही दिनमा नेपालको भू–भागमा समेत पर्ने सम्भावना रहेकाले सबैलाई सजग रहन मौसमविद् बरुण पौडेल आग्रह गरेका छन्।
आज अपरान्हपछि देशका धेरै स्थानमा सामान्यदेखी पूर्ण बदलीको भई वाग्मती प्रदेश र प्रदेश १ का उच्च हिमाली र पहाडी भू–भागका केही स्थानमा हल्कादेखि मध्यम हिमपात वर्षाको सम्भावना रहेको छ । उच्च हिमाली भू–भागमा हावाहुरीसमेत हुनसक्ने सम्भावना रहेकाले मंगलबारदेखि केही दिनसम्मका लागि पर्वतारोहीहरूलाई मौसम अनुसार सतर्कता अपनाई सुरक्षित रहन विभागले आग्रह गरेको छ ।
देशका धेरै स्थानमा बुधबारबाट केही दिन हल्कादेखि मध्यम वर्षाको सम्भावना छ । साथै प्रदेश १, प्रदेश २, वाग्मती प्रदेश, गण्डकी प्रदेश र लुम्बिनी प्रदेशका केही स्थानमा भारी वर्षा हुने सम्भावना रहेको छ । बिहीबार कर्णाली प्रदेश र सुदूरपश्चिम प्रदेशका केअी स्थानमा समेत भारी वर्षाको सम्भावना रहेको छ । उच्च हिमाली भू–भागहरू हिमपात र वर्षाको सम्भावना रहेकोले पर्वतारोहीहरूलाई सतर्क रहन विभागले भनेको छ ।
मेघगर्जन चट्याङ हावाहुरी र असिना–पानीकोसमेत सम्भावना रहेकाले आवश्यक सतर्कता अपनाउन मौसमविद् पौडेल बताउँछन् ।
पौडेलका अनुसार चक्रवातको असर तुलनात्मक रुपमा नेपालको पूर्वी क्षेत्रमा बढी पर्ने छ । मौसमविद् पौडेल भन्छन्, “चक्रवातको असर नेपालको पूर्वी क्षेत्रमा बढी पर्ने देखिएको छ । यद्यपि यसको असर मध्ये क्षेत्र र पश्चिममा पनि पर्नेछ । यसबाट सचेत रहन र विभागले निरन्तर सूचना प्रकाशन गर्दै आएको छ । सूचना अनुसार सतर्क रहन हाम्रो अनुरोध छ ।”
