झापाको बिर्तामोडमा अवस्थित न्युटन्स एजुकेसन एकेडेमीले आजदेखि विद्यार्थीहरूलाई लक्षित गरेर नेतृत्व र व्यक्तित्व विकास सम्बन्धी विशेष तालिम सुरु गरेको छ ।
बिर्तामोडस्थित बिर्तापाटी प्यालेसमा आयोजना गरिएको तालिम मङ्सिर ५ गतेसम्म चल्नेछ ।
विद्यालयका प्रिन्सिपल देवेन्द्र हुमागाईंका अनुसार सकारात्मक सोच, आत्मविश्वास निर्माण, तनाव व्यवस्थापन, अध्ययनमा ध्यान केन्द्रित गर्ने तरिका, समस्या समाधान लगायतका विषयमा कक्षा ४ देखि १२ सम्मका विद्यार्थीहरूलाई लक्षित गरी प्रशिक्षण सञ्चालन गरिएको हो ।
आज पहिलो दिन कक्षा ८ देखि १० सम्मका ५०० भन्दा बढी विद्यार्थीले प्रशिक्षणमा सहभागिता जनाएका छन् । उनीहरूलाई शैक्षिक प्रशिक्षक तथा परामर्शदाता वक्ता ईश्वर श्रेष्ठले प्रशिक्षण प्रदान गर्नेछन् ।
बुधबार कक्षा ५ देखि ८ सम्मका विद्यार्थी, बिहीबार कक्षा ४ का विद्यार्थी तथा एभरेस्ट स्मार्ट स्कूलका कक्षा ४ देखि १० सम्मका विद्यार्थीहरूका लागि तालिम सञ्चालन गरिने विद्यालयले जनाएको छ । मङ्सिर ५ गते भने कक्षा ११ र १२ का विद्यार्थीहरूलाई लक्षित प्रशिक्षण हुनेछ ।
विद्यालय व्यवस्थापन समिति अध्यक्ष धर्मा पराजुली पसाईंको अध्यक्षतामा भएको उद्घाटन समारोहको प्रमुख अतिथि अनारमनी पब्लिक क्याम्पस प्रमुख मोहन शिवाकोटी रहेका थिए ।
कार्यक्रममा प्रमुख अतिथि शिवाकोटी, नेल्टा कोशी प्रदेशका उपाध्यक्ष धर्मेन्द्र भट्टराई, बिर्ता लेडिज जेसिज महासचिव प्रभा कार्की लगायतले शुभकामना मन्तव्य राखेको कार्यक्रममा विद्यालयका डाइरेक्टर आशिष प्रसाईं, व्यवस्थापन समिति सदस्य लगायतको उपस्थिति रहेको थियो ।
विद्यालयका एकाडिमिक इन्चार्ज परासर दाहालले मन्तव्यबाट स्वागत गरेको कार्यक्रमको सञ्चालन शिक्षक जेनि राईले गरेकी थिइन् ।
