झापाको बिर्तामोडमा स्थित देवी माध्यमिक विद्यालयमा ‘बिग स्कूल प्रोजेक्ट’ अन्तर्गत निर्माण हुन लागेको नयाँ भवनको आज औपचारिक रूपमा शिलान्यास गरिएको छ ।
विद्यालय व्यवस्थापन समितिका सदस्य रतन राजवंशीको अध्यक्षतामा आयोजित कार्यक्रममा सभामुख देवराज घिमिरेले भवनको शिलान्यास गरेका थिए ।
नेपाल सरकार शिक्षा मन्त्रालयको केन्द्रीय आयोजना कार्यान्वयन इकाईमार्फत सञ्चालन हुने ‘बिग स्कूल प्रोजेक्ट’ अन्तर्गत देवी माध्यमिक विद्यालयमा ६ करोड रुपैयाँको लागतमा भवन निर्माण कार्य अघि बढाइने विद्यालयले जानकारी दिएको छ ।
कार्यक्रममा सभामुख घिमिरे, नेपाल सरकार शिक्षा मन्त्रालयका केन्द्रीय आयोजना कार्यान्वयन इकाईका निर्देशक लक्ष्मीप्रसाद भट्टराई, बिर्तामोड नगरपालिका प्रमुख पवित्रा महतारा प्रसाईं, उपप्रमुख नगेन्द्रप्रसाद संग्रौला, शिक्षा शाखा प्रमुख तिलचन भण्डारीलगायतले भवन निर्माण सम्पन्न भएपछि विद्यालयको शैक्षिक वातावरण थप सुदृढ हुने विश्वास व्यक्त गरेका थिए ।
प्रधानाध्यापक अम्बिका श्रेष्ठले मन्तव्यबाट स्वागत गरेको कार्यक्रमको सञ्चालन विद्यालयका सहायक प्रधानाध्यापक लीलाप्रसाद भण्डारीले गरेका थिए ।
