झापाको अर्जुनधारामा अवस्थित रुपरत्न ममोरियल आवासीय विद्यालयले विद्यार्थीहरुलाई पुरस्कृत गरेको छ ।
अर्जुनधारा नगरपालिका-७ मा रहेको विद्यालयले निजी तथा आवासीय विद्यालय संगठन (प्याब्सन) झापाको आयोजना र प्याब्सन अर्जुनधाराको सञ्चालनमा शनिबार सम्पन्न भएको नगरस्तरिय अतिरिक्त क्रियाकलाप कार्यक्रम अन्तरगत विभिन्न विधामा प्रथम, द्वितीय र तृतीय हुने विद्यार्थीहरुलाई विद्यालयले सम्मानित गरेको हो ।
यसरी पुरस्कृत हुनेहरुमा मावितर्फ नेपाली माध्यमको आकस्मिक वकतृत्वकला प्रतियोगितामा प्रथम हुने आकृति आचार्य, मावितर्फ नेपाली माध्यमको निबन्ध लेखन प्रतियोगितामा प्रथम हुने गृष्मा राई, आधारभूततर्फ अङग्रेजी माध्यमको श्रुतिलेखन प्रतियोगितामा प्रथम हुने पल्लवी घिमिरे र मावितर्फ कविता वाचन प्रतियोगितामा द्वितीय हुने योजना गौतम रहेका छन् ।
त्यसैगरी अन्य पुरस्कृत हुनेहरुमा जुनियरतर्फको हाजिरीजवाफ प्रतियोगितामा तृतीय हुने विद्यार्थीद्वय युनिसा मगर र सुरज प्रधान, आधारभूततर्फ नेपाली माध्यमको श्रुतिलेखन प्रतियोगितामा तृतीय हुने प्रनिश घिमिरे र प्रावितर्फ नेपाली माध्यमको हस्तलेखन प्रतियोगितामा तृतीय हुने रविना साङपाङ राई रहेका छन् ।
पुरस्कृत हुने विद्यार्थीहरुलाई विद्यालयकी संयोजक नम्रता गिरीले अविर लगाई नगद पुरस्कारबाट पुरस्कृत गरेकी थिइन् ।
नेपाल पत्रकार महासंघ झापा शाखाका सदस्य एवम् विद्यालयका व्यक्तित्व विकास तालिमका प्रशिक्षक अमित खम्बू लगायतले धारणा राखेको कार्यक्रमको सञ्चालन शिक्षक जीवन लिम्बूले गरेका थिए ।
