झापाको बिर्तामोडमा अवस्थित न्युटन्स एजुकेशन एकेडेमीले कक्षा ११ का नवआगन्तुक विद्यार्थीलाई स्वागत गरेको छ ।
विद्यालय अभिभावक संघका अध्यक्ष नरेश भट्टराईको अध्यक्षतामा भएको कार्यक्रमको प्रमुख अतिथि बिर्तामोड नगरपालिका वडा नं.२ का वडाध्यक्ष किशोरकुमार पौडेल रहेका थिए ।
त्रिदेव बहुमुखी क्याम्पस चारआलीका व्यवस्थापन समितिका अध्यक्ष हरि घिमिरे, नारी सञ्चार गृह झापाका अध्यक्ष स्वस्तिका आचार्यलगायतले नवआगन्तुक विद्यार्थीलाई शैक्षिक सफलताको शुभकामना दिएको कार्यक्रममा विद्यालयका प्रिन्सिपल देवेन्द्र हुमागाईंले विद्यार्थी तथा अभिभावकलाई शिक्षाप्रति जिम्मेवार बन्न आग्रह गरेका थिए ।
कक्षा १२ का विद्यार्थीहरूले नृत्य प्रस्तुत गरेको कार्यक्रममा विद्यार्थी रूवि पाठकले स्वागत गीत प्रस्तुत गरेकी थिइन् भने शिक्षकहरुले विद्यालयद्वारा जारी गरिएको मोबाइल एप प्रयोगसम्बन्धी जानकारी गराएका थिए ।
विद्यालयका प्लस टु को-अर्डीनेटर केवल सापकोटाले स्वागत मन्तव्यसहित विद्यार्थीले पालना गर्ने नियम र विद्यालयको आचारसंहिताको बारेमा जानकारी गराएको कार्यक्रमको सञ्चालन शिक्षक पवित्रा पौडेलले गरेकी थिइन् ।
