कप्तान सावित्रा भण्डारी(साम्बा)को ह्याट्रिकप्रेरित नेपालले एएफसी महिला एसियन कप छनोट खेलमा लगातार दोस्रो जित निकालेको छ ।
आज भएको खेलमा नेपालले श्रीलंकाविरुद्ध ८–० को जित निकालेको हो ।
बुधबार उज्वेकिस्तानको सम्पन्न खेलमा नेपालकी कप्तान सावित्राले ह्याट्रिक गरिन् भने गीता रानाले दुई गोल गर्दा निशा थोकर, रेखा पौडेल र पुजा रानाले समान एक गोल थपेका थिए ।
खेलको आठौँ मिनेटमा गीताको गोलमा नेपालले अग्रता बनाएको थियो । जसलाई २०औँ मिनेटमा सावित्राले दोब्बर बनाइन् । यस्तै ४२औँ मिनेटमा सावित्राले नै गोल गरेपछि नेपालले अग्रतालाई ३-० मा पुर्याएको थियो । ४५औँ मिनेटमा सावित्राले ह्याट्रिक गरेपछि नेपालले पहिलो हाफमै ४-० को अग्रता बनाएको हो ।
५४औँ मिनेटमा नेपालले पाएको पेनाल्टीलाई गीता रानाले सदुपयोग गरिन् । श्रीलंकन रक्षकले रश्मीकुमारी घिसिङमाथि १८ यार्ड बक्समा फाउल गर्दा नेपालले पेनाल्टी पाएको थियो । जसलाई गीताले सहजै जाली चुमाइन् ।
६२औँ मिनेटमा निशा थोकरको गोलमा नेपालले अग्रतालाई ६-० मा पुर्यायो । ७८औँ मिनेटमा रेखाले गोल गर्दै नेपालको यो अग्रतालाई ७-० मा राखिन् । खेलको निर्धारित समय सकिन लाग्दा पुजाले गोल गरेपछि नेपाल खेलमा ८-० अघि रहेको हो ।
प्रतियोगितामा यसअघि नेपालले पहिलो खेलमा लाओसविरुद्ध ९-० को जित निकालेको थियो । प्रतियोगितामा नेपाल समूह ‘एफ’ मा छ । यो समूहमा नेपाल, श्रीलंका, लाओस र उज्वेकिस्तान छन् । समूहबाट शीर्ष स्थान हासिल गर्ने टोलीले आगामी वर्ष अस्ट्रेलियामा हुने एसियन कपमा स्थान बनाउने छ ।
