राजवंशी समुदायबाट हेमन्त र रोशिकाले ल्याए फोर जीपीए

संवाददाता/ बुधबार, असार १८, २०८२

झापाको गौरादह-७ ग्वालडुब्बास्थित इमिनेन्ट कंचनजंघा इङ्गिलस बोर्डिङ स्कुलका हेमन्त राजवंशी र रोशिका राजवंशीले राजवंशी समुदायबाट एसईई परीक्षामा फोर जीपीए ल्याएका छन् ।

जिल्लाभरि ३१ जनाले फोर जीपीए ल्याएकोमा राजवंशी समुदायबाट फोर जीपीए ल्याउने हेमन्त र रोशिका मात्र हुन् ।

हेमन्त र रोशिकासहित इमिनेन्ट कंचनजंघाबाट चार जनाले फोर जीपीए ल्याएका छन् । आदिवासी जनजाति समुदायका धेरै विद्यार्थीहरु अध्ययनरत इमिनेन्ट कंचनजंघामा कुशल लिम्बूले पनि फोर जीपीए ल्याएका छन् ।

उक्त विद्यालयबाट ३३ जनाले एसईई दिएकोमा शतप्रतिशत उत्तीर्ण भएका छन् ।

गौरादहको बैरातीस्थित मामा देवकुमार राजवंशीको घरमा बसेर पढ्दै आएकी नन्दकिशोर र रीना राजवंशीका छोरी रोशिका मेडिकल पढ्न चाहन्छिन् । मेघलाल र चन्द्रा राजवंशीका छोरा हेमन्तको भने कम्प्युटर साइन्स पढ्ने इच्छा छ ।