झापाको शिवसताक्षीस्थित बालनिकुञ्ज माध्यमिक विद्यालयमा अक्षय कोष स्थापना गरिएको छ ।
दिवंगत लोकबहादुर कार्कीको स्मृतिमा परिवारजनले बिहीबार ५ लाख ५५ हजार ५५५ रुपैयाँको अक्षयकोष स्थापना गरेका हुन् ।
विद्यालयमा आयोजित समारोहमा अक्षयकोष दाता विष्णुमाया कार्की र उहाँको परिवारले उक्त रकम बराबरको चेक विद्यालयका प्रधानाध्यापक भवानीप्रसाद थापा र विद्यालय व्यवस्थापन समितिका अध्यक्ष कर्णबहादुर थापा हस्तान्तरण गरेको छ ।
दाता परिवारका तर्फबाट बोल्दै देवराज कार्कीले कोषको गरिमा र उद्देश्यमाथि प्रकाश पार्दै भने, ‘यो कोषको वार्षिक ब्याजबाट प्राप्त रकमको १० प्रतिशत पुन: मूल कोषमै जम्मा गरिनेछ, ताकि कोषको आकार निरन्तर वृद्धि हुँदै जाओस् । हाम्रो उद्देश्य यसलाई हरेक वर्ष अझ मजबुत बनाउँदै लैजानु हो ।’
कार्यक्रमका प्रमुख अतिथि, कोशी प्रदेशका खानेपानी, सिंचाई तथा ऊर्जा मन्त्री एकराज कार्कीले कार्की परिवारको यस कदमलाई ‘शिक्षा क्षेत्रमा गरिएको एक अनुकरणीय र महत्वपूर्ण कार्य’ भन्दै मुक्तकण्ठले प्रशंसा गरेका थिए ।
अक्षयकोष स्थापना तथा घोषणा समारोहमा राष्ट्रिय सभाका पूर्व सदस्य हरिचरण शिवाकोटी, शिवसताक्षी नगरपालिकाका पूर्व नगर प्रमुख चन्द्रकुमार शेर्मा र बिर्तामोड नगरपालिकाका नगर उप-प्रमुख नगेन्द्रप्रसाद संग्रौला लगायतले कार्की परिवारको शैक्षिक योगदानको उच्च प्रशंसा गरेका थिए ।
