विश्वकप लिग-२ अन्तर्गत स्कटल्यान्डमा जारी त्रिकोणात्मक एकदिवसीय खेलमा नेपाल लगातार दोस्रो खेलमा जित निकाल्न सफल भएको छ ।
गएराति भएको आफ्नो दोस्रो खेलमा नेपालले नेदरल्यान्ड्सलाई ५ विकेटले पराजित गर्दै प्रतियोगितामा लगातार दोस्रो जित सहित अङ्क तालिकामा १४ खेलबाट १० अङ्क बनाउन सफल भएको हो । तालिकामा नेपाल एकल अङ्कबाट दोहोरो अङ्क (डबल डिजिट) मा पुगेको हो ।
स्कटल्याण्डको डन्डी स्थित फोर्थहिल क्रिकेट मैदानमा टस जितेर पहिले ब्याटिङ गरेको नेदरल्यान्ड्सले दिएको २ सय २६ रनको लक्ष्य पछ्याएको नेपालले उक्त लक्ष्य ४७ दशलमव १ ओभरमा ५ विकेट गुमाएर पुरा गरेको हो ।
नेपालका लागि आरिफ शेखले सर्वाधिक ७८ रनको इनिङ खेल्दा दिपेन्द्र सिंह ऐरीले ३८ रन बनाएर अविजित रहेका थिए ।
त्यस्तै कप्तान रोहित पौडेलले २३ रन बनाउँदा आसिफ शेखले १९ र कुशल भुर्तेलले २५ रन बनाएर आउट भएका थिए । डच टोलीका लागि माइकल लेभिटले २ विकेट लिंदा भिभियन किंग र पउल भान मिकरेनले समान १-१ विकेट लिएका थिए ।
त्यसअघि टस जितेर ब्याटिङ गरेको डच टोली ४९ दशलमव १ ओभरमा अलआउट हुँदै २ सय २५ रनमा समेटियो । नेदरल्यान्ड्सका लागि कप्तान स्कट एडवार्डले ४६ रन बनाउँदा नोच क्रोएसले ४८ रन बनाएका थिए ।
त्यस्तै विक्रमजित सिंहले ३८ रन बनाउँदा जाच लियोन क्याचेटले २७ रन बनाए भने तेजा निदामनुरुले १३ रन रोलअफ भान डेर म्यार्युले २१ रन बनाएका थिए ।
नेपालका लागि सोमपाल कामीले ३ विकेट लिंदा करण केसी, सन्दीप लामिछाने र ललित राजवंशीले समान २-२ विकेट लिएका थिए ।
