झापाको बिर्तामोडस्थित देवी माध्यमिक विद्यालयमा आयोजना गर्न लागिएको कोशी प्रदेशस्तरीय विज्ञान तथा प्रविधि प्रदर्शनीमा ७० वटा विद्यालयले सहभागीता जनाउने भएका छन् ।
नेकपा एमाले विज्ञान तथा प्रविधि विभाग कोशीको आयोजनामा हुन लागेको प्रर्दशनीमा कोशी प्रदेशमा रहेका १२ जिल्लाका ७० विद्यालयले सहभागीता जनाउने भएका हुन ।
जेठ २४ देखि २६ गतेसम्म सञ्चालन हुने प्रर्दशनीमा झापाका माध्यमिक तहका तीन सय ९६ विद्यालयका विद्यार्थीसहित कोशी प्रदेशका एक लाख भन्दा बढी विद्यालर्थीले प्रर्दशनीको अवलोकन गर्ने आयोजकले दावी गरेको छ ।
बुधवार प्रर्दशनीस्थल देवी माध्यमिक विद्यालयमा पत्रकार सम्मेलनको आयोजना गर्दै प्रर्दशनीको स्टल निर्माण कार्य अन्तिम चरणमा पुगेको जानकारी गराइएको छ ।
प्रर्दशनीमा अप्रत्योगी २० वटा स:शुल्क स्टलहरु रहने छन् भने एक सय बढी स्टल राखिने कार्यक्रम रहेको नेकपा एमाले विज्ञान तथा प्रविधि विभाग कोशीका संयोजक गणेश पोखरेलले जानकारी दिए ।
पोखरेलका अनुसार प्रतियोगितामा उत्कृष्ट हुनेलाई नगद ४ लाख, द्वितीय हुनेलाई तीन लाख, तृतीय हुनेलाई दुई लाख र सान्तवना पुरस्कार एक लाख रुपैयाँ प्रदान गरिने छ । त्यस्तै प्रतिभा प्रोत्साहन पुरस्कार २५ वटा प्रदर्शनीलाई नगद २५ हजार रुपैयाँका दरले प्रदान गरिनेछ ।
विद्यार्थीमा रहेको विज्ञान तथा प्रविधि सम्वन्धि खोज तथा अनुसन्धानलाई प्रस्तुत गर्ने, विद्यार्थीका मैलिक प्रकृतिका आविस्कार तथा अन्वेषणलाई प्रोत्साहन गर्ने कार्यक्रमको मुख्य उद्देश्य रहेको कार्यक्रम संयोजक पोखरेलले जानकारी दिए । प्रतियोगिताको उद्घाटन पूर्व राष्ट्रपति विद्यादेवी भण्डारीले गर्ने कार्यक्रम तय भएको छ ।
पत्रकार सम्मेलनमा नेकपा एमाले कोशीका इञ्चार्ज तथा पूर्व मुख्यमन्त्री शेरधन राईले प्रर्दशनी सबैको साझा भएकाले अवलोकनका लागि आग्रह गरेका छन् ।
प्रदर्शनी सम्पन्न गर्न ४४ लाख ५० हजार रुपैयाँ खर्च हुने आयोजकले जनाएको छ । खर्च व्यवस्थापनका लागि कन्सलट्यान्सी सहितका २० वटा स्टलबाट एक लाख रुपैयाँका दरले २० लाख, झापाका १५ वटा स्थानीय तह र अन्य विभिन्न संघ संस्थासँग सहकार्य गरिने छ ।
