झापाको बुद्धशान्ति गाउँपालिकाले आयोजना गरेको प्रथम बुद्धशान्ति गाउँपालिका अन्तर मावि (कक्षा १० सम्म) टी १० छात्र नकआउट क्रिकेट प्रतियोगिताको उपाधि कर्णाली एजुकेशन फाउण्डेसनले उचालेको छ ।
बुद्धशान्ति-१ मा अवस्थित कर्णाली एजुकेशनले गढिगाउँ माविलाई ३४ रनले पराजित गर्दै उपाधि चुमेको हो ।
उपाधि चुमेसँगै कर्णाली एजुकेशन फाउण्डेसनले नगद १२ हजार, ट्रफी, मेडल र प्रमाणपत्र प्राप्त गरेको छ भने उपविजेता बनेको गढिगाउँ माविले नगद ८ हजार, मेडल, ट्रफी र प्रमाणपत्रमा चित्त बुझाएको थियो ।
टस जितेर पहिले ब्याटिङ गरेको कर्णालीले १० ओभरमा १ विकेट गुमाउँदै १०५ रनको लक्ष्य प्रस्तुत गरेको थियो । कर्णालीका लागि साजन गदाईलीले १४ बलमा ४४ रन बनाएका थिए ।
जवाफी ब्याटिङमा उत्रेको गढिगाउ माविले निर्धारित १० ओभर खेल्दै ९ विकेट गुमाएर ७१ रन मात्र बनाउन सफल भयो । गढिगाउँका लागि अनिश सुनुवारले १५ रन बनाउन बाहेक अन्य ब्याट्सम्यानले दोहोर अङ्कमा रन बनाउन सकेनन् ।
प्रतियोगिताकै उत्कृष्ट खेलाडी साजन गदाईली, फाइनल खेलको म्यान अफ दि म्याच विजेता टिमका साजन गदाइली, उत्कृष्ट ब्याटर कर्णालीका ब्रेन्सन मगर, उत्कृष्ट बलर ज्योती अंग्रेजी माविका प्रवेश न्यौपाने, उत्कृष्ट विकेट किपर लालिगुराँस एजुकेसन एकेडेमीका पुस्कार श्रेष्ठ घोषित भएका थिए ।
प्रतियोगितामा गाउँपालिका भित्रका चारवटा संस्थागत र सातवटा सामुदायिक गरी ११ वटा विद्यालयले सहभागी जनाएका थिए ।
