मुम्बई इन्डियन्सलाई ५ विकटले स्तब्ध बनाउँदै पञ्जाब किङ्स् इन्डियन प्रिमियर लिग (आईपीएल)को फाइनलमा प्रवेश गरेको छ ।
गएराति भएको दोस्रो क्वालिफायर खेलमा टस हारे पहिले ब्याटिङ गरेको मुम्बईले ६ विकेट गुमाएर २०३ रन बनाएको थियो । २०४ रनको सो लक्ष्य पञ्जाबले एक ओभर बाँकी छँदै ५ विकेट गुमाएर पुरा गरेको थियो ।
पञ्जाबको जितको लागि कप्तान श्रेयर ऐयरले अविजित ८७, नेहाल वाधेराले ४८, ओपनर प्रियांश आर्याले २० रन जोड्दा जोश इंग्लिसले ३८ रनको योगदान दिएका थिए । मुम्बईका अश्वनी कुमारले २ विकेट लिँदा ट्रेन्ट बोल्ट र हार्दिक पान्ड्याले १-१ विकेट हात पारेका थिए ।
त्यसअघि अमदाबादमा पानी परेर दुई घण्टा ढिला सुरु भएको खेलमा मुम्बईले २० ओभरमा ६ विकेट गुमाएर २ सय ३ रन जोडेको थियो ।
मुम्बईका लागि जोनी बेयरस्टोले ३८, तिलक बर्मा र सूर्यकुमार यादवले समान ४४ रन बनाउँदै आउट हुँदा मन धिरले ३७ रन जोडेका थिए । पञ्जाबका लागि अजमतुल्लाह ओमारजाइले २ तथा काइल जेमीसन, मार्कस स्टोइनस, विजयकुमार वाइसक र युजभेन्द्र चहलले १-१ विकेट लिएका थिए ।
पहिलो क्वालिफायरमा पञ्जाबलाई ८ विकेटले हराउँदै रोयल च्यालेंजर्स बेंगलुरुले फाइनलमा स्थान सुरक्षित गरिसकेको छ । फाइनल खेल मंगलबार अहमदाबाद मैदानमा हुनेछ । दुवै टिमले अहिलेसम्म उपाधि नजितेकाले यसपटक आईपीएले नयाँ विजेता पाउने भएको छ ।
