त्रिभुवन विश्वविद्यालय पत्रकारिता तथा आमसञ्चार केन्द्रीय विभागले ‘मिडिया शिक्षाको सन्दर्भमा शिक्षण अभ्यासहरूमा जेनेरेटिभ एआईको प्रभाव’ विषयक कार्यशाला सम्पन्न भएको छ ।
कार्यशालाको प्रमुख वक्ताका रूपमा उपस्थित प्राध्यापक केके रेग्मीले कक्षाकोठा र समाचार कक्षमा जेनेरेटिभ एआईको बढ्दो प्रयोग र त्यसका प्रभावहरूबारे विश्लेषण गरेका थिए ।
कोभिड-१९ महामारीले तीव्र पारिएको डिजिटल रूपान्तरणले दक्षिण एसियामा मिडिया शिक्षा र अभ्यासमा ल्याएको परिवर्तनबारे समेतले जानकारी दिएका थिए । कार्यशालाको उद्देश्य मिडिया शिक्षामा एआई प्रविधिको उपयोग र त्यसको प्रभावबारे बहस सञ्चालन गरेका थिए ।
विशेषत: उच्च शिक्षा संस्थाहरूमा पाठ्यक्रम विकास र शिक्षण विधिका नवप्रवर्तनहरूमा एआईको भूमिका विषय केन्द्रमा रहेको थियो । कार्यक्रममा मानविकी तथा समाजशास्त्र संकायका सहायक डीन डाक्टर बामदेव अधिकारीले स्नातकोत्तर तहको पत्रकारिता कार्यक्रमको चौथो सेमेस्टरमा जेनेरेटिभ एआईसम्बन्धी नयाँ पाठ्यक्रम प्रारम्भ गर्न लागेकोमा विभागलाई शुभकामना व्यक्त गरेका थिए ।
कार्यशालामा डा.श्रीराम खनाल (ग्रामीण आदर्श क्याम्पस), मदन भण्डारी मेमोरियल कलेजको पत्रकारिता तथा आमसञ्चार विभागका प्रमुख यमबहादुर दुरा, जेभियर कलेजका आमसञ्चार विभाग प्रमुख चुन गुरुङ र त्रिवि पत्रकारिता विभागका डाक्टर शशी मरासिनी लगायतका वक्ताहरूले कोभिड महामारीको अवधिमा र त्यसपछि मिडिया शिक्षामा देखिएको डिजिटल रूपान्तरणबारे आफ्ना विचार व्यक्त गरेका थिए ।
त्यसैगरी क्यानडाको अटावा विश्वविद्यालयका डाक्टर भानुभक्त आचार्य, बंगलादेशको युनिभर्सिटी अफ लिबरल आर्ट्स बंगलादेशकी सैयदा सादिया मेहजबिन, पत्रकारिता विभागका डा.श्रीराम पौडेल र डा.घमराज लुइटेल, मिडिया एकेडेमीका उज्वल आचार्य, मिडिया अनुसन्धानकर्ता उमेश पोखरेल र आइटी विज्ञ रोमकान्त पाण्डे लगायतका विशेषज्ञहरूले जेनेरेटिभ एआईले दक्षिण एसियाली मिडिया शिक्षामा ल्याएको परिवर्तन, अवसर र चुनौतीहरूबारे आ-आफना धारणा राखेका थिए ।
