झापाको बिर्तामोड-४ मा रहेको गोमेन्द्र बिर्ता मोडल स्कुलले स्कुल क्याप्टेन र भाइस क्याप्टेनको छनोट निर्वाचनमार्फत गराएको छ ।
चार सदनका प्रमुख, उपप्रमुख र स्कुल क्याप्टेन र सहायक क्याप्टेन विद्यार्थीहरूले शुक्रबार मतदान गरेर छनोट गरेका छन् । कक्षा ५ देखि कक्षा १० सम्मको निर्वाचन मार्फत क्याप्टेन छनोट गरिएको विद्यालयले जनाएको छ ।
विद्यालयले निर्वाचन प्रक्रियाबाट एक वर्षका लागि चार वटा हाउसबाट एक जना क्याप्टेन, एक जना सहायक क्याप्टेन र स्कुल क्याप्टेन एक जना र एक जना सहायक गरी कुल १० जना छनोट भएको निर्वाचन आयोगको आयुक्त तथा शिक्षक सिएम खरेलले जानकारी दिए ।
उनले छात्र र छात्रा गरी कुल ३३ जना उम्मेदवारले निर्वाचनमा भाग लिएको बताए । निर्वाचनमा २ सय ५२ जना विद्यार्थीले मतदान गरेका थिए ।
नेपालमा सामान्यतया राजनीतिक तहमा ‘लिडर’ छान्न प्राय: चुनाव हुने गर्छ । राजनीतिक पार्टी तथा भातृ संगठनको नेतृत्व छनोट लोकतान्त्रिक पद्धतिअनुसार निर्वाचनबाट गरिँदै आएको छ । यस्तै झल्को दिने गरी विद्यालयले पनि निर्वाचन गरेको मतदान अधिकृत सौरभ तिम्सिनाले बताए ।
विद्यार्थीहरूमा प्रजातान्त्रिक व्यवस्थाअनुसार आफूले चाहेको लिडर कसरी छान्ने भन्ने कुराको नमुना प्रस्तुत गर्न यसरी निर्वाचन आयोजना गरिएको विद्यालयका निर्देशक तथा सञ्चालक उत्तम खनालले बताए ।
निर्वाचनबाट कक्षा १० का छात्रा रिप्लीका के.सी १२९ मत ल्याउँदै विद्यालयको क्याप्टेन र सहायक क्याप्टेनमा कक्षा १० कै छात्र एलेक्स पोखरेल १०६ मत ल्याउँदै विजयी भएका छन् ।
निर्वाचनबाट रेड हाउस क्याप्टेन कक्षा ८ का आयुष्मा उप्रेती २१, भाइस क्याप्टेन अभिमन्यु आर्चाय ४०, ब्लु हाउस क्याप्टेन कक्षा ९ ऋचा प्रसाई ३४, भाइस क्याप्टेन कक्षा ७ डेनियल गुरुङ ३४ मत ल्याउँदै निर्वाचित भएका छन् ।
त्यसैगरी यल्लो हाउस क्याप्टेन कक्षा ९ प्रेरणा सापकोटा २३, कक्षा ७ को भाइस क्याप्टेन अपेक्षा यादव २१, ग्रीन हाउस क्याप्टेन कक्षा ९ अमुल्य कार्की १८ र भाइस क्याप्टेन कक्षा ८ सिज्जल बुढाथोकीले ३७ मत ल्याउँदै विजयी भएका छन् ।
