झापाको एक संस्थागत विद्यालयले सामुदायिक विद्यालयमा आवश्यक सामाग्री टेवल कुर्सी प्रदान गरेको छ ।
बिर्तामोड-६ को एभरेष्ट स्मार्ट एजुकेशन एकाडेमीले बुट्टाबारीस्थित सरस्वती माध्यमिक विद्यालयलाई आवश्यक सामाग्री टेवल तथा कुर्सी प्रदान गरेको हो ।
एभरेष्ट स्मार्ट स्कुलले सेतो रंगको कुर्सी १३५ थान, कालो रंगको कुर्सी ५१ थान, सेतो रंगको टेवल ८३ थान, ग्रीन कलरको टेवल डवल ३१ थान र सिङ्गल ६ थान हस्तान्तरण गरेको हो ।
एभरेष्ट स्मार्ट स्कुलमा शुक्रवार उक्त सामाग्री बिर्तामोड-६ का वडाध्यक्ष सुर्यप्रसाद कन्दङ्वा, एभरेष्ट स्मार्ट विद्यालय व्यवस्थापन समितिका कार्यवहाक अध्यक्ष देवी गिरी, एभरेष्ट स्मार्ट स्कुलका प्रिन्सिपल अनुप शर्माले सरस्वती माविका विद्यालय व्यवस्थापन समितिका अध्यक्ष कैलाश कन्दङ्वा, सहायक प्रधानाध्यापक नारायण चम्लागाई र शिक्षक अभिभावक संघका अध्यक्ष मनीकुमार भट्टराईले हस्तान्तरण गरेका थिए ।
एभरेष्ट स्मार्ट स्कुलले बिद्यालयसम्म पुर्याउने यातायात खर्चसमेत उपलब्ध गराउने प्रिन्सिपल शर्माले जानकारी दिए । एभरेष्ट स्मार्ट स्कुल नामले ‘स्मार्ट’ भएको र त्यसलाई अझ स्मार्ट बनाउन नयाँ टेवलकुर्सी ल्याएको बताउँदै ती सामाग्री सामुदायिक बिद्यालयमा दिन वडाध्यक्ष कन्दङ्वाको आग्रह अनुसार सरस्वती माविलाई हस्तान्तरण गरिएको विद्यालयका प्रिन्सिपल शर्माले बताए ।
एभरेष्ट स्मार्ट एजुकेशन एकाडेमीका विद्यालय व्यवस्थापन समितिका कार्यवहाक अध्यक्ष देवी गिरीको अध्यक्षतामा भएको कार्यक्रममा बिर्तामोड-६ का वडाध्यक्ष कन्दङ्वाको प्रमुख आतिथ्यता रहेको थियो ।
कार्यक्रममा प्रमुख अतिथि वडाध्यक्ष कन्दङ्वा, सरस्वती माविका सहायक प्रधानाध्यापक नारायण चम्लागाई लगायतले एभरेष्ट स्मार्ट स्कुलले संस्थापक विद्यालय भएर पनि सामुदायिक विद्यालयलाई आवश्यक सामाग्री सहयोग गरेको भन्दै प्रशंसा गरेका थिए ।
एभरेष्टका विद्यालय व्यवस्थापन समितिका कार्यवहाक अध्यक्ष देवी गिरीले झापाका शिक्षासेवी स्व.हरि प्रसाईंले शिक्षा क्षेत्रमा गरेको योगदानका विषयमा चर्चा गरेका थिए । गिरीले स्व.प्रसाईंले स्थापना गरेको एभरेष्ट स्मार्टले गरिवका छोराछोरी पढ्ने सामुदायिक विद्यालयलाई आवश्यक टेवलकुर्सी प्रदान गरेर उनको शिक्षाप्रतिको मोहलाई अझ साकार पारेको बताए ।
उक्त कार्यक्रममा एभरेष्ट विद्यालय व्यवस्थापन समितिकी सदस्य निरु ओली, सामाजिक व्यक्तित्व निरज ओली, युवराज खतिवडा लगायतको आतिथ्यता रहेको थियो ।
एभरेष्ट स्मार्ट स्कुलका पिन्सिपल शर्माले स्वागत तथा औचित्यमाथि प्रकाश पारेको कार्यक्रमको सञ्चालन एभरेष्ट स्कुलकी शिक्षिका सावित्रा भट्टराईले गरेकी थिइन् ।
