धाराको पानीमा खराबी नभएर मास हिस्टेरियाका कारण मिनी माउन्टेन इङलिस सेकेण्डरी बोर्डिङ स्कुल बाह्रदशीका विद्यार्थीहरु विरामी परेको चिकित्सकले बताएका छन् ।
बुधबार दिउँसो २ बजे बाह्रदशी गाउँपालिका-६ स्थित मिनी माउन्टेन ईङलिस सेकेण्डरी बोर्डिङ स्कुलमा अध्ययनरत विद्यार्थीहरुले सोही विद्यालयको खानेपानीको धाराबाट पानी पिउँदा पेट दुखेर १७ जना सिकिस्त भएका थिए ।
बिरामी विद्यार्थीहरुलाई बिद्यालयका शिक्षकहरुले उपचारको लागि बिर्तासिटी अस्पताल बिर्तामोडमा ल्याई उपचार गराएको प्रहरीले जनाएको छ । विरामी हुने विद्यार्थीहरु कक्षा ४ र ५ का हुन् । उनीहरु सबै निको भई डिस्चार्ज भएको जिल्ला प्रहरी कार्यालयका सूचना अधिकारी डीएसपी खगेन्द्र खड्काले बताए ।
उनले धाराको पानी खाँदा विरामी हुनुपर्ने कारणबारे अनुसन्धान भइरहेको बताए । विद्यालयको त्यस धाराको पानी विज्ञद्वारा परीक्षण गरिने उनले जानकारी दिए ।
विद्यालयका सञ्चालक खगेन्द्र सुवेदीले पहिला ३-४ जनाले धाराको पानी खाएर भुँडी दुख्यो भनेर लडीबडी गरेको बताए । त्यसपछि उनीहरुका अरु साथीहरुले पनि त्यसरी नै भुँडी दुख्यो भनेर रुन कराउन थालेका थिए ।
विरामी भएका सबै विद्यार्थीहरुलाई अस्पताल लगेर निको पारेर ल्याइएको उनले जानकारी दिए । धाराको पानीमा खराबी नभएर विरामी विद्यार्थीहरुमा मास हिस्टेरियाको लक्षण देखिएको सञ्चालक सुवेदीले बताए ।
बिर्तासिटी हस्पिटलका चिकित्सक डा.रमेश यादवले विद्यार्थीहरुमा मास हिस्टेरियाको लक्षण देखिएको जानकारी दिए । उनले धाराको पानी पनि परीक्षण गर्न आवश्यक रहेको बताए । ‘धाराको पानीमा समस्या नदेखिएको खण्डमा मनोवैज्ञानिक रुपमा विद्यार्थीहरु सामूहिक विरामी हुन सक्छन्’ उनले भने । प्रतिदिन दैनिकबाट
