बिर्तामोड नगरपालिकाले सामुदायिक तथा धार्मिक विद्यालयका कक्षा ५ सम्मका विद्यार्थीलाई यस वर्षको पोसाक वितरण सुरु गरेको छ ।
वडा नम्बर ९ को शहीद लक्ष्मी आधारभूत विद्यालयमा आयोजित कार्यक्रममा नगर प्रमुख पवित्रा महतारा प्रसाईंले दुई जना छात्र र दुई जना छात्रालाई पोसाक लगाईदिएर वितरण कार्यक्रमको शुभारम्भ गरेकी थिइन् ।
नगरपालिकाले आर्थिक वर्ष २०७८/७९ देखि हरेक वर्ष पोषाक वितरण कार्यक्रम सञ्चालन गर्दै आएको छ । यस वर्ष १८ वटा सामुदायिक र दुई वटा धार्मिक गरि २० वटा विद्यालयका ३ हजार ९२५ जना विद्यार्थीलाई पोषाक वितरण गरिने नगर प्रमुख प्रसाईंले जानकारी दिइन् ।
उक्त अवसरमा बोल्दै उनले अभिभावकलाई थोरै भए पनि सहयोग पुगोस् भन्ने उद्देश्यले हरेक वर्ष विद्यालय पोषाक वितरण गर्दै आएको बताइन् ।
पोसाक वितरण कार्यक्रममा वडा नम्बर ९ का वडाध्यक्ष हरिप्रसाद चौलागाई, नगरका शिक्षा शाखा प्रमुख तिलचन भण्डारी लगायतले आ-आफना धारणा राखेका थिए ।
कार्यपालिका सदस्य संगिता सिवा, शिक्षा शाखा अधिकृत लासाङ तामाङ, विद्यालय व्यवस्थापन समिति सदस्य प्रेम भण्डारी लगायतको उपस्थिति रहेको कार्यक्रमको सञ्चालन विद्यालयका प्रधानाध्यपक गुरुप्रसाद घिमिरेले गरेका थिए ।
