त्रिदेव बहुमुखी क्याम्पस चारआलीको आयोजना र विश्वविद्यालय अनुदान आयोगको सहयोगमा सञ्चालित प्राध्यापक लक्षित तीनदिने रिसर्च मेथडोलोजी एण्ड पुर्नताजकी तालिम सोमबार सम्पन्न भएको छ ।
तालिम समापन सत्र क्याम्पस प्रमुख गोपीकृष्ण भट्टराईको अध्यक्षता तथा त्रिभुवन विश्वविद्यालय अन्तर्गतको शिक्षा विकास तथा अनुसन्धान केन्द्र सेरिडका कार्यकारी निर्देशक डा.राजेन्द्र कुँबरको प्रमुख आतिथ्यमा सम्पन्न भएको थियो ।
उक्त अवसरमा बोल्दै प्रमुख अतिथि कुँवरले अनुदान आयोगमा कता कता व्यक्तिगत सम्बन्ध हावी भएको हो कि भन्ने देखिए पनि आफूहरुले पनि कर्तव्य कति पालना गर्यौं र कति इमान्दारपूर्वक काम गर्यौं भन्नेतर्फ पनि मूल्याङ्कन गर्नुपर्ने बताए ।
तालिम समापनमा क्याम्पस सञ्चालक समितिका अध्यक्ष हरिप्रसाद घिमिरेले प्राध्यापकहरुले सिकेका कुुराहरुलाई व्यवहारमा उतार्न र कक्षा कोठासम्म पुुर्याउन सहभागी प्राध्यापकहरुलाई आग्रह गरेका थिए भने संस्थापक क्याम्पस प्रमुख माधव प्याकुरेलले विगतदेखि नै क्याम्पसमा विभिन्न प्रकारका तालिम कार्यक्रमहरु सञ्चालन हुुँदै आएपनि यो तालिम फरक प्रकृतिको भएको बताए ।
तालिमको सहजीकरण महेन्द्र रत्न बहुमुखी क्याम्पस इलामका सह-प्राध्यापक डा.अरुण नेपाल, मेची बहुमुखी क्याम्पसका प्रा.डा.गंगाप्रसाद अधिकारी,जनता बहुमुखी क्याम्पसका सह-प्राध्यापक डा.टोलनाथ काफ्ले र मनमोहन प्राविधिक विश्वविद्यालयका रजिस्ट्रार प्र.डा.दिलनाथ फुयालले गरेका थिए ।
झापा जिल्लाका विभिन्न सातवटा सामुदायिक क्याम्पसका प्राध्यापकहरूको सहभागिता रहेको तालिम समापन कार्यक्रमको सञ्चालन व्यवस्थापन विभाग प्रमुख साबित्रा दाहालले गरेकी थिइन् ।
