भारत-पाकिस्तानबीच युद्धको सुरुवात भएसँगै भारतीय क्रिकेट कन्ट्रोल बोर्ड (बीसीसीआई) ले अनिश्चितकालका लागि आईपीएल स्थगित गरेको छ । यद्यपि बीसीआइले नयाँ तारिखबारे केही जानकारी दिएको छैन ।
आजदेखि आईपीएलका बाँकी खेलहरु आयोजना हुने छैनन् । भारत र पाकिस्तानबिचको पछिल्लो तनावको असर आईपीएलमा परेको हो ।
दुबै राष्ट्रले एक-अर्काविरुद्ध सैन्य कारबाही सुरु गरेका कारण बीसीसीआईले आईपीएल रद्द गर्ने निर्णय लिएको हो । दुबै देशबीच तनाव सुरु भएपछि आईपीएल खेलाइने रङ्गशालाहरुमा पनि आक्रमणको धम्की प्राप्त भएका थिए ।
आईपीएल खेलिरहेका विदेशी खेलाडीहरुमा पनि त्रास देखिएको थियो । हिजोको खेल प्रभावित बनेको थियो । यी सबै पक्षलाई ध्यानमा राखेर आईपीएल रद्द गर्ने निर्णय भएको बीसीसीआईलाई उद्दृत गरी भारतीय सञ्चारमाध्यमले जनाएका छन् । बीसीसीआईले सरकार र आईपीएलमा सहभागी सबै टोलीसँग सल्लाह गरेर यस्तो निर्णय लिइएको जनाएको छ ।
आईपीएलको १८औँ संस्करणमा अहिलेसम्म ५८ खेल भएका छन् । जसमा गुजरात टाइटन्स ११ खेलमा १६ अङ्कसहित शीर्ष स्थानमा छ । समान खेलमा १६ अङ्कसहित रोयल च्यालेन्जर्स बेङ्ग्लुरु दोश्रो स्थानमा, १५ अङ्कसहित पञ्जाब किङ्गस तेश्रो र १२ खेलमा १४ अङ्कसहित मुम्बई इन्डियन्स तालिकाको चौथो स्थानमा छ ।
