झापाको बिर्तामोडमा मिनी आर्ट फेयर कार्यक्रम आयोजना हुने भएको छ ।
देही आर्टको आयोजना तथा कलालयको सहयोगमा आगामी बैशाख १८ र १९ गते बिर्तामोडको शनिश्चरे रोडमा अवस्थित इशा बुक्सको प्राङगणमा कार्यक्रम हुने भएको हो । सिक्ने र सिकाउनेहरुको संयोजन गराउने उद्देश्यले कार्यक्रम गरिएको जनाइएको छ ।
उक्त अवसरमा प्रत्यक्ष चित्रकला, चित्र बनाउँदा चाहिने सामग्रीहरु कहाँ पाइन्छ, कुन चित्रहरु कसरी बनाउन सकिन्छ लगायतका विषयमा समेत प्रशिक्षण दिने जनाइएको छ ।
विद्यालयस्तरमा बालबालिकाहरुले सिक्दै गरेका आर्टसम्बन्धी विषयलाई प्रभावकारी बनाउने र पब्लिक समक्ष आफैँ उभिएर बनाउन प्रेरित गर्नुका साथै कला, साहित्यबाट पनि जिवीकोपार्जन र विद्यार्थीहरुको क्षमता प्रदर्शनको लागि कार्यक्रमको आयोजना गरिएको जनाइएको छ ।
विद्यालयस्तरमा कक्षा ३ भन्दा माथि अध्ययन गर्ने विद्यार्थीहरुले सहभागी हुन पाउनुका साथै उनीहरुले बनाएका सामग्रीहरु छ भने नि:शुल्क रुपमा प्रस्तुत गर्न पाउने इशा बुक्सका सञ्चालक केशव मैनालीले जानकारी दिए ।
इशा बुकले यसअघि किताब मेलाको समेत आयोजना गरेको थियो । यसबाट धेरै विद्यार्थीहरु तथा वौद्धिक व्यक्तिहरु लाभान्वित भएका थिए । आफनै हातले चित्र बनाउने र यहाँ बनाएका चित्रहरु सस्तो मूल्यमा किन्न पनि पाउने सञ्चालक मैनालीले बताए ।
