इस्ट होराइजन र निदि सेकेन्डरी स्कुल हरिकुमार प्रसाईं अन्तर विद्यालय अन्डर १३ जिल्लास्तरीय नकआउट फुटबल प्रतियोगिताको फाइनलमा प्रवेश गरेका छन् ।
शिक्षासेवी हरिकुमार प्रसाईंको संझनामा सञ्चालन भइरहेको प्रतियोगिताको सोमबार भएका सेमिफाइनल खेलहरुमा आ-आफ्ना प्रतिष्पर्धीहरुलाई पराजित गरी इस्ट होराइजन र निदिले फाइनल भेट पक्का गरेका हुन् ।
पहिलो सेमिफाइनल खेलमा निदिले आयोजक एभरेष्ट स्मार्टलाई २-० ले हराएको हो । उक्त खेलमा निदिका गौरव राजवंशी म्यान अफ द म्याच घोषित भएका थिए ।
त्यस्तै सोमबारै भएको दोस्रो सेमिफाइनल खेलमा इस्ट होराइजनले बाल्मीकि प्रोभिडेन्सलाई १-० ले पराजित गरी उपाधि नजिक पुगेको हो ।
फाइनल खेल आज बिहान ११ बजेदेखि सुरु हुने आयोजक एभरेष्ट स्मार्ट एजुकेशन एकाडेमीका प्रिन्सिपल अनुप शर्माले जानकारी दिए । प्रतियोगितामा १६ वटा विद्यालयले सहभागिता जनाएका थिए ।
