झापाको बिर्तामोड-६ स्थित एभरेष्ट स्मार्ट एजुकेशन एकाडेमीमा जारी हरिकुमार प्रसाईं अन्तर विद्यालय अन्डर १३ जिल्ला स्तरीय नकआउट फुटबल प्रतियोगिताको बुधवार भएका खेलमा सुनगाभा, निदि र बाल्मीकि स्कुल विजयी भएका छन् ।
बुधबारको पहिलो खेल सुनगाभा इङ्गिलस स्कुल र गोमेन्द्र बिर्ता मोडलबिच भएको थियो । त्यस खेलमा पेनाल्टी सुटआउटबाट ४-३ गोलले सुनगाभा विजयी भएको हो । खेलको म्यान अफ द म्याच सुनगाभाका गोलकिप्पर एलेश आङ्वो भएका छन् ।
त्यस्तै दोस्रो खेलमा निदि सेकेन्डरी स्कुल विजयी भएको छ । निहारिका बोर्डिङ स्कुलसँगको खेलमा ५-२ को गोल अन्तरमा निदि विजयी बनेको हो । निदिका पुजन दाहाल दुई गोल गर्दै म्यान अफ द म्याच भएका थिए ।
त्यस्तै तेस्रो खेल बाल्मीकि फाउण्डेशन र मेची इङ्गिलस बोर्डिङ स्कुलबिच भएकोमा ३-० गोलले बाल्मीकि विजयी बन्यो । दुई गोल गरेका बाल्मीकिका दर्पण गुरुङ म्यान अफ द म्याच घोषित भएका छन् ।
आज दुई खेल हुनेछन् । जसमा पहिलो खेल ग्लोबल इङ्गिलस स्कुल र इष्ट होराइजनबीच तथा दोस्रो खेल लिटल फ्लावर्स र सूर्योदय स्कुलबीच हुने एभरेष्ट स्मार्ट एजुकेशन एकाडेमीका प्रिन्सिपल अनुप शर्माले जानकारी दिए । फागुन ६ गते फाइनल खेल हुने प्रतियोगितामा १६ वटा विद्यालयको सहभागिता रहेको छ ।
