कमल गाउँपालिकाको आयोजनामा झापा जिल्ला अन्तरपालिका कर्मचारी फुटबल हुने भएको छ ।
प्रतियोगितामा झापाका १५ वटा पालिकाका कर्मचारीहरू बिच सुमधुर सम्बन्ध कायम गर्ने उद्देश्यले विगत सात वर्षदेखि प्रतियोगिता सञ्चालन हुँदै आएको छ ।
प्रतियोगिता यही माघ ११ देखि १९ गतेसम्म सञ्चालन हुनेछ । क्वाटर फाइनलका खेल माघ १५ देखि १६ गते सम्म हुनेछ ।
त्यसैगरी सेमीफाइनल माघ १७ गते र फाइनल खेल माघ १९ गते १ बजेदेखि हुने सहसंयोजक दिपेन्द्र लामिछानेले बताए ।
उक्त प्रतियोगितामा प्रथम हुने पालिकाले नगद १ लाख रुपैयाँँसहित ट्रफी, मेडल र प्रमाण पत्र पाउने छ भने द्वितीय हुनेले नगद ५० हजार रुपैयाँका साथै ट्रफी, मेडल र प्रमाण पत्र प्राप्त गर्ने छ ।
त्यस्तै विधागतमा पुरस्कार अन्तर्गत मेन अफ द म्याचले ट्रफी र अन्य विधा अन्तर्गत मेन अफ द टुर्नामेन्ट किपर, बेस्ट डिफेन्डर, उच्च गोलकर्ताले नगद ६ हजार ६ सय छैसठ्ठी रुपैयाँ पाउने छन् ।
त्यस्तै फेयर प्ले टिमले ट्रफी र प्रमाण पत्र पाउनुका साथै सहभागी सबै पालिकालाई मायाको चिनो प्रदान गरिने खेल संयोजक तथा कमल गाउँपालिका शिक्षा शाखा प्रमुख सूर्यप्रसाद न्यौपानेले जानकारी दिए ।
