नेपाल प्रिमियर लिग (एनपीएल) को अक्सनका लागि खेलाडीले आफ्नो नाम जुनसुकै ग्रेडमा पनि दर्ता गराउन पाउने भएका छन् ।
नेपाल क्रिकेट संघ (क्यान) ले असोज १२ सम्मको समय खेलाडी दर्ताका लागि खुला गरेको छ ।
खेलाडीले आफ्नो नाम ए, बी र सी ग्रेडमा दर्ता गराउन पाउने छन् । सी ग्रेडका खेलाडीको न्यूनतम मूल्य २ लाख, बी को ५ लाख र ए को १० लाख रुपैयाँ तोकिएको छ ।
त्यस्तै सी ग्रेडका खेलाडीले उच्चतम ५ लाख, बी ग्रेडकाले १० लाख र ए ग्रेडका खेलाडीले १५ लाख तोकिएको छ । उच्चतम मूल्यमा पुगेपछि चिट्ठाबाट खेलाडी छनोट हुनेछन् ।
नेपाल क्रिकेट संघ (क्यान) का प्रवक्ता छुम्बी लामाले खेलाडीले आफ्नो विवेक अनुसार कुनै पनि ग्रेडमा नाम समावेश गर्न सक्ने बताए ।
सबै नाम आएपछि खेलाडीको सर्ट लिष्ट गरेर अक्सनमा जाने उनी बताउँछन् । क्यानले अक्सन दशैंअघि गर्ने जनाए पनि मिति भने तय गरेको छैन । अघिल्लो हप्ता लक्की ड्र मार्फत मार्की खेलाडी छनोट गरिएको थियो ।
एनपीएल नोभेम्बर ३० देखि डिसेम्बर २१ सम्म त्रिवि क्रिकेट मैदानमा हुनेछ ।
