झापाको अर्जुनधारामा पूजाको प्रसाद खाँदा ५० जनाभन्दा बढी बिरामी परेका छन् । उनीहरुलाई ‘फुड पोइजन’ भएको बताइएको छ ।
अर्जुनधारा-९ स्थित खरबन्दीमा मंगलबार स्थानीय रीता निरौलाको घरमा पूजा लगाइएको थियो । सोही पूजामा प्रसादस्वरुप रोटी, अचार, तरकारी बाँडिएको एक बिरामीले बताए ।
प्रसाद खाएका अधिकांश बिरामीलाई बान्ता, पखाला र ज्वरो आउने लक्षण रहेको शनिश्चरे अस्पतालका चिकित्सकले बताएका छन् । बिरामी हुनेमा बालबालिकादेखि लिएर बृद्धबृद्धासम्म रहेका छन् ।
बिरामी परेका अधिकांश बिरामीको नगरको स्वास्थ्य शाखा प्रमुख सन्तोष चिमरियाको कालिस्थानस्थित क्लिनिकमा उपचार भइरहेको छ । क्लिनिकमा कम्तिमा पनि ३० जनाको उपचार भइरहेको छ । यस्तै गाउँकै अन्य क्लिनिकमा पनि बिरामीको उपचार भइरहेको बताइएको छ ।
क्लिनकमा बेड अभाव भएर बार्दली, कम्पाउण्ड, बेञ्चलगायतका स्थानमा बिरामीको उपचार भइरहेको छ । बिरामी भएर गाउँमै रहेका ८ जनालाई नगरपालिकाको गाडीले शनिश्चरे अस्पताल उपचारका लागि ल्याएको छ ।
यसैबीच अर्जुनधाराका नगरप्रमुख बलदेवसिंह गोम्देन, उपप्रमुख खड्गमाया पराजुलीलगायत जनप्रतिनिधिले बिरामीलाई भेटेर स्वास्थ्य अवस्था निरीक्षण गरेका छन् ।
आज साँझ बिरामी भएको खबर पाउनासाथ स्वास्थ्य अवस्था बुझ्न नगरप्रमुखको टोली क्लिनिक र अस्पताल पुगेको थियो । गाउँमा रहेका बिरामीलाई नगरप्रमुख गोम्देनकै पहलमा उपचारका लागि अस्पताल ल्याइएको सचिवालयले जनाएको छ ।
अस्पतालमा २५ वर्षीया लक्ष्मी दर्नाल, ६२ वर्षीय चन्द्रबहादुर दर्नाल, ६० वर्षीय तेज बाँस्कोटा, २९ वर्षीय नारायण बाँस्कोटा, ५२ वर्षीया हरिमाया भुजेल, १५ वर्षीय रिवज बाराकोटी, ४० वर्षीया तारा बारोकोटी र ६० वर्षीया हर्कमाया दर्नालको उपचार भइरहेको छ ।
कति बिरामीले सामान्य उपचारपछि घरमै स्वास्थ्य लाभ लिइरहेका छन् भने अस्पतालमा बिरामी आउने क्रम जारी रहेको छ । अस्पतालका अनुसार बिरामीको अवस्था खतरामुक्त रहेको बताइएको छ ।
