झापाको दमक ७ बराह टोल लेखनाथ मार्गमा नवनिर्मित पौड्याल वंशोद्धार केन्द्रिय समितिको नवनिर्मित भवन परिसरमा आज (बुधबार)देखि शुरु हुने सप्ताहव्यापी श्रीमद भागवत बराह महापुराणको सम्पूर्ण तयारी पूरा भएको छ ।
महापुराण आयोजक मुल समितिले मंगलबार पुराण आयोजनास्थल पौड्याल वंशोद्धार केन्द्रिय समितिको भवन परिसरमा आयोजना गरेको पत्रकार सम्मेलनमा सो महापुराणको मूल उद्धेश्य बन्धु एकता, सामाजिक सेवा र राष्ट्रसेवा भएको जानकारी दिइयो ।
पौडेल वंश महासंघका केन्द्रिय अध्यक्ष समेत रहेका महापुराण आयोजक मुल समितिका संयोजक लोकनाथ पौड्यालले हरेक मानिसले आफनो र आफना पुर्खाको इतिहासबारे जान्ने बुझ्ने भए मात्रै आफू को हुँ ? भन्ने पहिचान गर्न सक्ने बताए ।
सामाजिक सेवाका क्षेत्रमा पौडेल बन्धुहरु सम्बद्ध विभिन्न संघ संस्थाहरुले गरिरहेको योगदान बारे चर्चा गर्दै अध्यक्ष पौड्यालले पुराण आयोजना पौड्याल बन्धुहरुले गरेता पनि यो दमकको र राष्ट्रकै लागि दिर्घकालिन महत्व र उद्धेश्य राख्ने पुराण भएकाले यसलाई सकारात्मक रुपमा यहाँको समाजले ग्रहण गर्नेमा आयोजक समिति विश्वस्त रहेको उल्लेख गरे ।
२०५१ सालमा पूर्वमा पौडेल बन्धुहरुको सामुहिक प्रयासबाट झापाको कोटीहोममा लगाइएको सामुहिक पुराणपछि पहिलो पटक अर्थात २९ बर्षपछि पौडेल बन्धुहरुले यो पुराण आयोजना गरेको हुँदा यसमा उल्लेख्य सहभागिता रहने अपेक्षा गरिएको महापुराणका प्रचार प्रसार संयोजक समेत रहेका पौड्याल वंशोद्धार झापा जिल्ला समिति अध्यक्ष कमल पौडेलले जानकारी दिए । उनका अनुसार यसपटकको पुराणका लागि प्रचार प्रसारका शिलसिलामा विभिन्न ठाउँमा पुग्दा पौडेल बन्धुहरु पुराणप्रति उत्साहित रहेको पाइएकाले ७ दिनको अवधिमा ७ हजार भन्दा बढी मानिसहरु पुराणमा सहभागी हुने विश्वास गरिएको बताए ।
उनले आर्थिक संकलन मुल उद्धेश्य नभई नवनिििर्मत भवन परिसरमा जग्गादाता स्व. गंगाबहादुर पौड्यालको परिवारले १६ लाख ५० हजार रुपैयाँको लागतमा बनाएर पौड्याल वंशोद्धार समितिलाई हस्तान्तरण गरेको बराह मन्दिरको प्राण प्रतिष्ठा तथा अनावरण र ७० लाख रुपैयाँको लागतमा झण्डै २७ बर्ष लगाएर निर्माण गरिएको भवनको उदघाटनको अवसर समेत पारेर महापुराणको आयोजना गरिएको बताए । यो भवनको २०५३ सालमा तत्कालिन सभामु तथा वर्तमान राष्ट्रपति रामचन्द्र पौडेलले शिलान्यास गरेका थिए ।
पुष ४ गते सम्म दैनिक रुपमा हुने वराह महापुराण पाठ पारायण एवं धनधान्याञ्चल महायज्ञसहित यो भवनको उदघाटन दमक नगरपालिकाका प्रमुख रामकुमार थापाले गर्ने कार्यक्रम रहेको छ ।
महायज्ञ सम्पन्न गर्न पौडेल वंश महासंघका केन्द्रिय अध्यक्ष समेत रहेका लोकनाथ पौड्यालको संयोजकत्वमा महापुराण आयोजक समितिको सहसंयोजकमा पौड्याल वंशोद्धार केन्द्रिय समितिका उपाध्यक्ष प्रल्हादकुमार पौड्याल, सचिव युवराज पौडयाल, अर्थसचिव दुर्गा पौड्याल, सहसचिव बुद्धिमान पौड्याल, कोषाध्यक्ष शशि पौड्याल, वंशोद्धार समितिका केन्द्रिय नेतृत्वहरु मन्धरा पौडेल, रामकुमारी पौडेल,(कलश यात्रा संयोजक) प्रचार संयोजक कमल पौड्याल, पूजा व्यवस्थापन संयोजक पार्वता पौड्याल लगायत सम्पूर्ण पौडेल बन्धुहरुको सक्रिय सहभागितामा यो महायज्ञको तयारी भएको हो । महापुराण मूल आयोजक समितिले आवश्यक तयारी पुरा भएको जनाएको छ ।
पौड्याल वंशोद्धार समिति र यसको भवन लगायत सम्पूर्ण संरचना बिकासका परिकल्पनाकार दमक ७ का वडाध्यक्ष भिमप्रसाद पौडेलले यहाँ निर्मित भवन पौडेल बन्धुहरुको मात्रै नभएर समग्र दमक नगरबासीकै साझा सम्पत्ती भएको बताए । उनले दाता परिवारबाट सार्वजनिक सम्पत्तीका रुपमा प्रदान गरिएको जग्गा, यहाँको मन्दिर र भवन निर्माण समेतमा गरेको योगदानको सम्मानका लागि पनि यो महायज्ञ आवश्यक भएको बताए ।
महापुराणमा प्रमुख कथावाचकका रुपमा आचार्य पण्डीत शान्तिराम नेपाल रहनेछन भने उपवाचकद्धय अग्नीप्रसाद पौड्याल र लक्ष्मीप्रसाद पौड्याल रहेका छन ।
महापुराणको पहिलो दिन बुधबार बिहान १० बजे भवन परिसरबाट कलश यात्रा शुरु हुनेछ । दमकको मुख्य भाग परिक्रमा गरी दिउँसो १ बजे भवन र महायज्ञको उदघाटन गर्ने कार्यक्रम रहेको आयोजक समितिले जनाएको छ । दैनिक बिहान १० बजेदेखि साढे ३ बजे सम्म कथावाचन हुनुका साथै हरेक साँझ आरती, भजन किर्तन लगायतका रोचक कार्यक्रमहरु हुनेछन ।
