नेकपा एमाले निकट राष्ट्रिय युवा संघ नेपाल बिर्तामोड नगरपालिका ४ नम्बर वडा कमिटीले गरिव, विपन्न परिवारलाई झुल वितरण गरेको छ । शनिबार विहान एक कार्यक्रमका विच युवा संघले झुल वितरण गरेको हो ।
बिर्तामोड ४ स्थित सुन्दर सामुदायिक टोल बिकास संस्थाको प्रगतिनगर क्षेत्रमा रहेको सुकुम्बासी बस्तिमा बसोबास गर्ने गरिब, विपन्न परिवारलाई झल वितरण गरिएको युवा संघका वडा अध्यक्ष नारायण मुखियाले जानकारी दिए । उनका अनुसार बढ्दो डेंगु संक्रमणको जोमिखबाट समुदायको सुरक्षाको लागि झुल वितरण गरिएको हो ।
सोही अवसरमा उक्त अभियानलाई नेपाल तामाङ घेदुङ बिर्तामोड कोषाध्यक्ष समिक्षा तामाङले १० थान झुल आयोजक कमिटीलाई हस्तान्तरण गरेकी थिइन् ।
युवा संघका केन्द्रीय सदस्य खगेन्द्रराज आङ्देम्बेको प्रमुख आतिथ्यतामा सम्पन्न कार्यक्रममा नेकपा एमाले झापाका सचिवालय सदस्य तथा नगर इन्चार्ज देवराज कार्की र बिर्तामोड नगर कमिटीका अध्यक्ष सुवास भट्टराई लगायतले झुल वितरण गरेका थिए ।
युवा संघले वृक्षरोपण, सरसफाई अभियान, रक्तदान जस्ता उदारहणीय काम गर्दै सामाजिक उत्तरदायित्व पुरा गरिरहेको पार्टीका नगर अध्यक्ष भट्टराईले बताएका थिए । उनले युवाहरु सक्रिय राजनीतिसँगै सामाजिक काममा सक्रिय हुनुपर्ने उनको भनाई थियो । यस्तै, नगर इञ्चार्ज कार्कीले बिर्तामोडमा युवा संघको सक्रियताको खुलेर प्रशंसा गरेका छन् । कांग्रेसका युवाहरु गुण्डाको संरक्षणमा लागिरहेको बेला एमालेका युवाहरु सामाजिक क्षेत्रमा सेवा पुर्याइरहेको भन्दै धन्यवाद व्यक्त गरेका छन् ।
राष्ट्रिय युवा संघ बिर्तामोड ४ का अध्यक्ष नारायण मुखियाको अध्यक्षतामा सम्पन्न कार्यक्रममा संघका नगर अध्यक्ष, सचिव,जननिर्वाचित वडा अध्यक्ष, सदस्य, वडा कमिटीका अध्यक्ष साथै विभिन्न संघसंगठनका पदाधिकारीहरुको सहभागिता रहेको थियो । झुल वितरण कार्यक्रमको सञ्चालन गणेश तामाङले गरेका थिए ।
