झापाको शिवसताक्षी नगरपालिकामा आइतबार एक औषधी पसलबाट भारी मात्रामा प्रतिबन्धित गरिएको औषधि बरामद भएको छ।
शिवसताक्षी नगरपालिका वडा नम्बर ७ मा रहेको ब्याङडाडा मेडिकल हलबाट उक्त औषधी फेला परेको हो।
जिल्ला स्वास्थ कार्यालय झापा, शिवसताक्षी नगरपालिका, इलाका प्रहरी कार्यालय झिलझिले, दुधे बजार बिकास समितीको संयुक्त टिमले औषधी पसल छापा मार्ने क्रममा लागुऔषधको रुपमा प्रयोग गर्ने प्रतिबन्धित ट्रामाडोल ९ नौ सय तिस थान क्याप्सुल बरामद भएको इलाका प्रहरी कार्यालय झिलझिलेका प्रमुख युवराज कटुवालले जानकारी दिएका छन् ।
मेडिकलमा चेक जाँच गर्ने क्रममा ट्रामाडोल नामक प्रतिबन्धित औषधी कोठाको पलङमा लुकाएर राखेको अवस्थामा फेला परेको स्वास्थ कार्यालय झापाका प्रमुख रमेश बारकोटीले बताएका छन् ।
उनका अनुसार यो औषधी मेडिकलमा राखेर डाक्टरको सिफारिस बिना नेपालमा बेचबिखन गर्न रोक भएको जानकारी दिएका छन् । यस्ता प्रतिबन्धित औषधिहरु पछिल्लो समय लागुऔषधको रुपमा प्रयोग भएको उनले बताए ।
उनका अनुसार, ‘जिल्लाका विभिन्न स्थानबाट यस्ता औषधि स्वास्थ कार्यालयले बरामद गर्दै आएको छ। प्रतिबन्धित औषधि बरामद भएको मेडिकल संयुक्त टिमले चाबी लगाएर बन्द गरिसकेको छ। मेडिकल संचालक गौरभ आङबो काम बिशेषले बाहिर रहेको कारण नियन्त्रणमा लिन नसकेको इलाका प्रहरी कार्यालय झिलझिलेले जानकारी दिएको छ ।
त्यससँगै शिवसताक्षी ६ शिवगंज संचालित निश्चल फार्मेसीमा पनि २१३ थान प्रतिबन्धित औषधि फेला परेको छ। शिवसताक्षीमा बड्दो चोरीका घटनाहरु भएको कारण लागुऔषध भएको र यस प्रकारको औषध सेवन गर्ने र कारोबार गर्नेलाई जराबाट नै उखेल्न दुधे बजार बिकास समिती लागेको अध्यक्ष सन्तोष कुमार थोप्राले बताएका छन् ।
