झापा । ईलामको माई नगरपालिका २ स्थित चेप्टीमा निर्माण भईरहेको “हेप्पी ड्रिम्स चेप्टी ” पार्क पर्यटकहरुको आकर्षणको केन्द्र बन्ने क्रममा रहेको छ । मुख्यगरी आन्तरीक पर्यटनको प्रर्वद्धनको उदेश्य राखी सञ्चालनमा आएको पार्कमा टिकट बिक्री खुल्ला भएकै दिन करीव १ हजार पर्यटकहरुले अवलोकन गरेका छन् ।
झापा कनकाईमा रहेको हेप्पी ल्याण्ड फनपार्कका पूर्व संचालक समेत रहेका पर्यटन व्याबसायी दिनेश शिवाकोटीले संचालनमा ल्याएको पार्कको ४० प्रतिशत बढी निर्माण कार्य सम्पन्न भएको छ । दुईसय रोपनी क्षेत्रफलमा फैलिएको निर्माणाधिन हेप्पी ड्रिम्समा एक अर्वको लागत लाग्ने अनुमान गरीएको छ । पार्कमा हालसम्म ३२ करोड लगानी भइसकेको परियोजनाका सञ्चालक शिवाकोटी बताउँछन् ।
झापाको बिर्तामोडदेखि अनुमानित २५ किलोमिटर दुरीमा रहेको यस पार्क रमणीय स्वच्छ बताबारण, माई खेलाको किनार ,चुरे पहाड र झोलुङगे पुल का कारण आन्तरिक तथा वाह्य पर्यटकका लागि आकर्षक गन्तव्य बन्न सक्ने सञ्चालकको भनाई छ ।
हेप्पी ड्रिम्स चेप्टीमा पानी जहाज, जीपलाइन, डुङ्गा सयर, हेलिकप्टर, विभिन्न प्रकारका पिंङ, सेल्फी डाँडा, घोडचडी, नमुना आकर्षक हिमाल, हिमलबाट बग्ने झरना, डान्सिङ कटेज, आकर्षक गार्डेन, साथै मुर्तिकलाहरु ड्राइगन,लगायतका संरचनाहरु बनाईएको छ । आगामी दिनमा केवलकार समेत सञ्चालन गर्ने योजना रहेको छ ।
बिकासको दृष्टिकोणबाट पछि परेको जस्तो देखिने यस क्षेत्रमा परियोजना शुरु पश्चात स्थानीयहरुले विकासको महशुष गर्न थालेका छन् । स्थानीयस्तरमै रोजगारीको सिर्जना भएपछि सर्वसाधारण उत्साहित बनेका छन् । प्रति रोपनी डेढ लाखसम्म् बिक्री नहुने अवस्थामा रहेको जमिनको मूल्य बढेर १२ लाखसम्म पुगेको स्थानीयको भनाई छ ।
मिराकल पार्कलाई समेत बिर्साउने पार्क निर्माण गर्ने अवधारणासहित आगामी दिनमा धार्मिक पर्यटकीय स्थलको रुपमा विकास गर्ने उद्देश्यले उक्त परियोजना सुरु गरिएको सञ्चालक शिवाकोटी बताउँछन् ।
हाल यहाँ खान र बस्नको लागि रिसोर्टको निर्माण कार्य भईरहेको छ । प्रदुषण रहित स्वच्छ वातावरण र माईखालाको बतास, जंगल, खोल्साको चिसो ओसले गर्मी महिनामा यहाँ पुग्नेको मनै आनन्दीत बनाउनेछ ।
