जेठ १८, झापा । नेकपा एमाले बिर्तामोड नगर कमिटीले ५० थान अक्सिजनसहितको सिलिन्डर खरिद गरी बिर्तामोडको नगर अस्पताललाई दिनका लागि आज बिर्तामोड ल्याइपुर्याएको छ ।
विभिन्न दाताहरुबाट संकलन गरेको रकमबाट एभरेष्ट ग्यास उद्योग काठमाडौंबाट खरिद गरी ती सिलिन्डर ल्याइएको हो ।
जुन सिलिन्डर भोलि बिहान बिर्तामोड नगरपालिकालाई हस्तान्तरण गर्ने कार्यक्रम रहेको छ ।
नगर अस्पताललाई ५० वटा अक्सिजनसहितको सिलिन्डर हस्तान्तरण गर्नका लागि नेकपा बिर्तामोडले सहयोग संकलन अभियान संचालन गरेको थियो । त्यसअन्तर्गत १ सय वटा सिलिन्डरको रकम संकलन भएको थियो ।
विभिन्न दाताहरुले करीब १५ लाख रुपैयाँ सहयोगको घोषणा गरेकोमा १३ लाख उठिसकेको र २ लाख उठ्न बाँकी रहेको नेकपा बिर्तामोडका नगर कमिटी सचिव सुवास भट्टराईले बताए । ५० वटा सिलिन्डर खरिद गरिसकेपछि करीब ६ लाख ५० हजार रुपैयाँ उब्रिएको बताउँदै उनले त्यस रकमलाई सबैको सल्लाहमा महामारीकै लागि खर्च गर्ने जानकारी दिए । नगर कमिटीले प्रतिसिलिन्डर १६ हजार रुपैयाँमा खरिद गरेको हो । त्यस्तै प्रतिसिलिन्डर २ सय रुपैयाँ ढुवानी खर्च लागेको जनाइएको छ ।
एकजना दाताले एक सिलिन्डरबराबरको नगद सहयोग गरेका थिए । बिर्तामोड ५ नं वडाका जनप्रतिनिधिहरुले ३ वटाको रकम दिएका थिए भने व्यवसायी रोशन अग्रवालले दुईवटाको लागि ३० हजार रुपैयाँ हस्तान्तरण गरेका थिए । बिर्तामोड नगरपालिकाले नगर अस्पतालको सेवा संचालनमा ल्याएको छ । नगर अस्पतालमा कोरोना संक्रमितहरुको उपचारका लागि ती सिलिन्डर उपलब्ध गराउन लागिएको हो । नगर अस्पतालको भवन तीब्र रुपमा निर्माण भइरहेको छ । नगरपालिकाले यसअघि नै अनारमनीमा रहेको स्वास्थ्य चौकी भवनमा अक्सिजनसहित ५ शैय्याको कोभिड अस्पताल सञ्चालनमा ल्याएको छ ।
त्यस्तै बिर्तामोड नगरपालिकाले बढ्दो कोरोना संक्रमणलाई दृष्टिगत गरी ५० शैय्याको आइसोलेसन सेन्टर संचालनमा ल्याएको छ । मेची आँखा अस्पतालको भवनमा अक्सिजनसहित ५० शैय्याको आइसोलेसन सेन्टर संचालनमा ल्याइएको नगरपालिकाले जनाएको छ ।
