झापाको बिर्तामोड-१० मा अवस्थित विष्णु भवानी अङ्ग्रेजी विद्यालयले आफ्नो नवौं वार्षिकोत्सव विभिन्न शैक्षिक तथा सांस्कृतिक कार्यक्रमसहित सम्पन्न गरेको छ ।
विद्यालयका प्रधानाध्यापक पुण्यप्रसाद उप्रेतीको अध्यक्षतामा भएको कार्यक्रममा बिर्तामोड नगरपालिका शिक्षा, युवा तथा खेलकुद शाखा प्रमुख तिलचन भण्डारीको प्रमुख आतिथ्यता रहेको थियो ।
उक्त अवसरमा विभिन्न संस्कृतिहरू झल्कने नृत्य तथा राष्ट्रिय गीत-संगीतले कार्यक्रमलाई आकर्षक बनाएको थियो ।
कार्यक्रमका प्रमुख अतिथि भण्डारीले विद्यार्थीलाई कला, संस्कृति र आफ्नो पहिचानसँग परिचित गराउन विद्यालयले खेलेको भूमिका अतुलनीय रहेको बताए ।
त्यस्तै विशिष्ट अतिथि प्याब्सन नगर कमिटी अध्यक्ष सुरेन्द्र खरेलले अभिभावकले बालबालिकालाई उनीहरूको रुचिअनुसार गतिविधि गर्न दिए पनि पूर्ण रूपमा स्वतन्त्र छोड्न नहुने धारणा राखेका थिए ।
कार्यक्रममा न्यूटन्स एजुकेसन एकाडेमीका प्रिन्सिपल देभेन्द्र हुमागाई, कञ्चन अङ्ग्रेजी बोर्डिङ स्कुलका प्रिन्सिपल दीपक चम्लागाईं, बालबालिका तथा शिक्षा सञ्चार मञ्चका संयोजक सरोज पौडेल, अभिभावक, शिक्षक-शिक्षिका तथा विद्यार्थीहरूको उल्लेख्य उपस्थिति रहेको थियो ।
विद्यालय व्यवस्थापन समितिका अध्यक्ष विष्णु दाहाल उप्रेतीले कार्यक्रमको औचित्यमाथि प्रकाश तथा स्वागत मन्तव्य राखेको कार्यक्रमको सञ्चालन लिला अनमोलले गरेकी थिइन् ।
