निजी तथा आवासीय विद्यालय अर्गनाइजेसन नेपाल (प्याब्सन) झापाको आयोजनामा बिर्तामोड नगरस्तरीय सांस्कृतिक गायन तथा नृत्य प्रतियोगिता सम्पन्न भएको छ ।
झापाको बिर्तामोड नगरपालिका-१० मा अवस्थित विष्णु भगवती अङ्ग्रेजी माध्यमिक विद्यालयको प्राङ्गणमा शनिबार सुरु भएको प्रतियोगिता आइतबार समापन भएको हो ।
प्याब्सन बिर्तामोड नगर समितिका अध्यक्ष सुरेन्द्र खरेलको अध्यक्षतामा भएको समापन समारोहको प्रमुख अतिथि बिर्तामोड नगरपालिका शिक्षा, युवा तथा खेलकुद शाखा प्रमुख तिलचन भण्डारी रहेका थिए ।
प्रतियोगितामा सहभागी विद्यार्थीहरूले नेपाली संस्कृति झल्कने भेषभूषासहित सांस्कृतिक पहिचान अनुसारका आकर्षक नृत्य प्रस्तुत गरेका थिए।
सांस्कृतिक नृत्य प्रतियोगितामा कञ्चन अङ्ग्रेजी विद्यालय प्रथम, चिल्ड्रेन अङ्ग्रेजी विद्यालय द्वितीय र न्युटन अङ्ग्रेजी विद्यालय तृतीय स्थान हासिल गर्न सफल भएको छ ।
विजेता विद्यालयका विद्यार्थीहरूलाई प्रमुख अतिथि भण्डारी, प्याब्सन बिर्तामोड नगर समितिका अध्यक्ष खरेल तथा विशेष अतिथि हिसान झापाका कार्यवाहक अध्यक्ष उत्तम खनालले मेडल, ट्रफी र प्रमाणपत्र प्रदान गरेका थिए ।
कार्यक्रमको औचित्यमाथि प्रकाश पार्दै प्याब्सन झापा अध्यक्ष छत्र कार्कीले विद्यार्थीको अन्तर्निहित प्रतिभा प्रस्फुटन गराउन तथा समाज र संस्कृतिसँग बालबालिकालाई घुलमिल गराउन यस्ता कार्यक्रमहरू अत्यन्त महत्वपूर्ण हुने बताए ।
उक्त अवसरमा बोल्दै प्रमुख अतिथि भण्डारीले सामुदायिक र संस्थागत विद्यालयबीच विभेद गर्नु नहुने धारणा राख्दै निजी विद्यालयहरूले गुणस्तरीय शिक्षा प्रदान गरेकै कारण अभिभावकको आकर्षण बढ्दै गएको बताएका छन् ।
कार्यक्रममा शिक्षक महासङ्घ बिर्तामोड झापाका अध्यक्ष युवराज कट्टेल, न्युटन्स एजुकेसन एकेडेमीका निर्देशक आशिष प्रसाईं, बालबालिका तथा शिक्षा सञ्चार मञ्चका संयोजक सरोज पौडेल, पत्रकार, विभिन्न शैक्षिक सङ्घसंस्थाका प्रतिनिधि, शिक्षक-शिक्षिका, अभिभावक तथा विद्यार्थीहरूको उल्लेख्य उपस्थिति रहेको थियो ।
प्याब्सन बिर्तामोड नगर समितिका कोषाध्यक्ष प्रमिला बजगाईंले स्वागत गरेको कार्यक्रमको सञ्चालन सचिव दीपंकर मैनालीले गरेका थिए ।
