झापाको बिर्तामोडमा अवस्थित न्युटन्स एजुकेसन एकेडेमीमा विद्यार्थीहरूलाई लक्षित गरेर आयोजना गरिएको नेतृत्व र व्यक्तित्व विकास सम्बन्धी विशेष तालिम सम्पन्न भएको छ ।
बिर्तामोडस्थित बिर्तापाटी प्यालेसमा आयोजना गरिएको तालिम गत मङ्सिर २ गते सुरु भएको थियो ।
तालिमको अन्तिम दिन कक्षा ११ र १२ का विद्यार्थीहरूले प्रशिक्षणमा सहभागिता जनाएका थिए । उनीहरूलाई शैक्षिक प्रशिक्षक तथा परामर्शदाता वक्ता ईश्वर श्रेष्ठले प्रशिक्षण प्रदान गरेका थिए ।
विद्यालयका डाइरेक्टर आशिष प्रसाईंको अध्यक्षतामा भएको समापन समारोहको प्रमुख अतिथि प्रतिनिधिसभाका उपसभामुख इन्दिरा राना मगर रहेकी थिइन् ।
कार्यक्रमको औचित्य माथि प्रकाश पार्दै विद्यालयका प्रिन्सिपल देवेन्द्र हुमागाईंले सकारात्मक सोच, आत्मविश्वास निर्माण, तनाव व्यवस्थापन, अध्ययनमा ध्यान केन्द्रित गर्ने तरिका, समस्या समाधान लगायतका विषयमा कक्षा ४ देखि १२ सम्मका विद्यार्थीहरूलाई लक्षित गरी प्रशिक्षण सञ्चालन गरिएको बताए ।
कार्यक्रमलाई सम्बोधन गर्दै प्रमुख अतिथि उपसभामुख मगरले पढ्नुका साथै उद्देश्य लिएर काम गरियो भने जीवनमा सफल हुने भएकाले विद्यार्थीहरुलाई एउटा उद्देश्य लिएर अघि बढ्न सुझाव दिएकी थिइन् ।
इन्द्रचन्द्र क्याम्पसका प्रमुख प्रकाश दाहाल, देवी माध्यमिक विद्यालयका सहायक प्रधानाध्यापक लीलाप्रसाद भण्डारी लगायतले मन्तव्य राखेको कार्यक्रममा नेपाल उद्यमशील महिला संघ अध्यक्ष पार्वता बिमली खरेल, बिर्तामोड नगर प्याब्सन उपकोषाध्यक्ष दिपक चम्लागाई, जुनकिरी आधारभूत विद्यालयका प्रधानाध्यापक रञ्जित परियार, विद्यालय व्यवस्थापन समिति सदस्य लगायतको उपस्थिति रहेको थियो ।
विद्यालयका प्लस टु कोडिनेटर केवल सापकोटाले मन्तव्यबाट स्वागत गरेको कार्यक्रमको सञ्चालन शिक्षक पवित्रा पौडेलले गरेकी थिइन् ।
