निजी तथा आवासीय विद्यालय संगठन प्याब्सन झापा शाखाअन्तर्गत बिर्तामोड नगर समितिले आयोजना गरेको प्याब्सन स्पोट्रस मिट आजबाट सुरु भएको छ ।
उक्त प्रतियोगितामा ३० वटा निजी तथा आवासीय विद्यालयले सहभागिता जनाएका छन् ।
४.८ फिट उमेर समुहका छात्रहरुको फुटबल खेलको उद्घाटन कार्यक्रम आज बिहान बिर्तामोड स्थित प्रशान्ति एजुकेशन फाउन्डेसनको खेल मैदानमा भएको थियो भने अन्य विधाका खेलहरु पनि अन्य विद्यालयका खेल मैदानमा एकैसाथ उद्घाटन भएका थिए ।
प्रतियोगिताको उद्घाटन समारोहमा प्याब्सन नगर अध्यक्ष सुरेन्द्र खरेल, कोषाध्यक्ष प्रमिला बजगाईं, सहकोषाध्यक्ष दिपक चम्लागाईं, विद्यार्थी, शिक्षक, अभिभावक तथा विद्यालयका प्रतिनिधिहरूको उत्साहपूर्ण सहभागिता रहेको थियो ।
स्पोट्रस मिटबाट विद्यार्थीहरूको शारीरिक, मानसिक र नेतृत्व क्षमता विकासमा महत्वपूर्ण योगदान पुग्ने विश्वास गरिएको खेल संयोजक तथा नगर प्याब्सन सदस्य रहमद अन्सरीले बताए ।
उनले प्रतियोगितामा एथलेटिक्स, फुटबल, भलिबल लगायतका विभिन्न खेल विधाहरू समावेश गरिएको बताएका छन् । सबै खेलहरू व्यवस्थित ढंगले सञ्चालन गर्न आवश्यक प्राविधिक तथा जनशक्तिको तयारी पूरा गरिएको आयोजक समितिले जनाएको छ ।
स्पोट्रस मिट शनिबारसम्म निरन्तर सञ्चालन हुनेछ भने समग्र प्रतियोगिता मंसिर १ गतेभित्र सम्पन्न गर्ने लक्ष्य राखिएको छ । समापन समारोहमा उत्कृष्ट खेलाडी तथा विद्यालयहरूलाई पुरस्कार, मेडल र प्रमाणपत्र प्रदान गरिनेछ ।
छात्रछात्राको गुणस्तरीय शिक्षासँगै सहपाठ्यक्रम र खेलकुद क्रियाकलापलाई प्रोत्साहन गर्न प्याब्सनले हरेक वर्ष विभिन्न कार्यक्रम सञ्चालन गर्दै आईरहेको छ ।
