झापाको मेचीनगर नगरपालिका वडा नं.१२ सहरेडाँगीमा अवस्थित श्री सरस्वती बाल कल्याण माध्यमिक विद्यालयमा पूर्व विद्यार्थी समाज पुर्न गठन गरिएको छ ।
वडादशैको शुभकामना आदानप्रदान तथा पूनर्मिलन कार्यक्रमको अवसर पारेर पुन: टीकाराम रिजालको नेतृत्वमा ११ सदस्यीय समिति गठन गरिएको हो ।
समितिको उपाध्यक्षमा कमला तिम्सिना, सचिवमा गोपाल ढुङ्गेल, सहसचिवमा उमेश खतिवडा र कोषाध्यक्षमा चिरञ्जीवी कोइराला सर्वसम्मत चयन भएका छन् ।
त्यस्तै सदस्यहरुमा रेगन प्रसाईं, अशोक राई र कुशल महरालाई चयन गरिएको छ भने अन्य तीन जना सदस्य आगामी बैठकबाट मनोनीत गरिने जनाइएको छ ।
त्यसैगरी विभिन्न क्षेत्र तथा देशलाई प्रतिनिधित्व हुने गरि संयोजक तोकिएको छ । जस अन्तर्गत काठमाडौँ संयोजक महेश दाहाल, अस्ट्रेलिया रुपा न्यौपाने, जापान रोश्नी पोखरेल र कोरिया विनोद दाहाल र अन्य देशीय संयोजक पनि चाँडै तोक्ने जनाइएको छ ।
यसैबीच आजै बसेको कार्यसमितिको पहिलो बैठकले कोष स्थापनाका लागि बैंक खाता खोल्ने निर्णय गरेको कोषाध्यक्ष चिरञ्जीवी कोइरालाले जानकारी दिए ।
समाजका अध्यक्ष टीकाराम रिजालको अध्यक्षतामा भएको कार्यक्रमको प्रमुख अतिथि अर्जुनधारा नगरपालिका वडा नं.१० का वडाध्यक्ष तथा पूर्व विद्यार्थी भुपेन्द्र न्यौपाने रहेका थिए ।
उक्त अवसरमा प्रमुख अतिथि वडाध्यक्ष भुपेन्द्र न्यौपाने, विद्यालयका प्रधानाध्यापक शुक्रराज घिमिरे, मेचीनगर नगरपालिकाका कार्यपालिका सदस्य तथा पूर्व विद्यार्थी समाजका पूर्व अध्यक्ष अमित खम्बु, पूर्व विद्यार्थीका तर्फबाट सुर्य घिमिरे लगायतले शुभकामना मन्तव्य राखेका थिए ।
पूर्व विद्यार्थी तथा शिक्षक अभिभावक संघका अध्यक्ष राजेन्द्र सापकोटा, विष्णुप्रसाद रिमाल लगायतले आ-आफ्ना धारणा राखेको कार्यक्रमको सञ्चालन सचिव गोपाल ढुङ्गेलले गरेका थिए ।
