झापाको बिर्तामोड-३ मा अवस्थित लिङ्कन मन्टेश्वरी विद्यालयले पठन-पाठनसँगै संस्कृति र परम्पराको जगेर्ना गर्ने उद्देश्यले ‘दशैं मिलन कार्यक्रम’ सम्पन्न गरेको छ ।
दशैं आउन केही दिन बाँकी भएपनि विद्यालय शुक्रबारदेखि बिदा हुने भएकाले विद्यार्थीहरूलाई पर्वसम्बन्धी जानकारी प्रदान गर्ने उद्देश्यले उक्त कार्यक्रम आयोजना गरिएको विद्यालयका सञ्चालक सरोज पौडेलले जानकारी दिए ।
टिका र जमरामा सजिएका नानी-बाबुहरू खुसी हुँदै दशैं पर्वको अनुभव व्यक्त गरिरहेको देख्दा, ‘हरेक कुराको सुरुवात बालापनबाटै हुन्छ,’ भन्दै विद्यार्थी नवीन कार्कीका बुबाले यस किसिमका कार्यक्रमले बालबालिकामा संस्कृतिप्रतिको चासो र ज्ञान बढाउने धारणा राखेका थिए ।
बिर्तामोड नगरपालिकाकी शिक्षा शाखा अधिकृत जानुका रेग्मीको प्रमुख आतिथ्यतामा भएको कार्यक्रममा न्युटन एजुकेसन एकाडेमीका प्रिन्सिपल देवेन्द्र हुमागाईं,आदर्श कलेज अफ होटेल म्यानेज्मेटका प्रमुख संजोक खरेल , नेपाल पत्रकार महासंघ झापा शाखाका उपाध्यक्ष सुव्रत न्यौपाने ,पत्रकार भरत प्रसाई, देब बाँस्कोटा, अभिभावक तथा शिक्षकहरुको उपस्थिति रहेको थियो ।
उक्त अवसरमा प्रमुख अतिथि रेग्मीले बालबालिकालाई टीका-जमरा लगाउँदै, पठन-सिकाइसँगै संस्कृतिको संरक्षणमा सहभागी गराउनु सामाजिक उत्तरदायित्व अन्तर्गतको महत्वपूर्ण कार्य भएको बताइन् ।
विद्यालयका सञ्चालक सरोज पौडेलले दशैं पर्व मनाउने तरिका बालबालिकालाई बुझाउन सांस्कृतिक अभ्यासका रूपमा कार्यक्रम गरिएको बताए ।
